പോര്ച്ചുഗല് എന്നാല് ക്രിസ്റ്റിയാനോ റൊണാള്ഡോ എന്നാണ് ലോകം കാണുന്നത്. അതിന് അടിവരയിടുന്നതാണ് ടീമിന്റെ ലോകകപ്പ് പ്രകടന ചരിത്രം. പോര്ച്ചുഗല് ഫുട്ബോളിനെ രണ്ടായി വിഭജിച്ചുകൊണ്ടല്ലാതെ ഇക്കാര്യത്തില് ഒരു വരി പോലും കുറിക്കാനാവില്ല. ക്രിസ്റ്റിയാനോ റൊണാള്ഡോയ്ക്ക് മുമ്പ് പോര്ച്ചുഗല് മൂന്ന് തവണ മാത്രമാണ് ലോകകപ്പ് കളിച്ചിട്ടുള്ളത്. 1966ല് ഇംഗ്ലണ്ടില് ആദ്യ തവണ, മൂന്നാം സ്ഥാനം വരെ മുന്നേറി. പിന്നെ 20 വര്ഷത്തെ കാത്തിരിപ്പിന് ശേഷം 1986ല് മെക്സിക്കോയില് ഗ്രൂപ്പ് ഘട്ടത്തിനപ്പുറം പോയില്ല. വീണ്ടുമൊരു 16 വര്ഷത്തെ കാത്തിരിപ്പിന് ശേഷം 2002ല് യോഗ്യത നേടി. അക്കൊല്ലവും ഗ്രൂപ്പ് സ്റ്റേജിനപ്പുറം പോയില്ല. പിന്നെ 2006 ജര്മന് ലോകകപ്പ് എത്തുമ്പോഴേക്കും ആ 21കാരന് ടീമിന്റെ മുന്പന്തിയിലുണ്ടായിരുന്നു. അതിന് രണ്ട് വര്ഷം മുമ്പ് സ്വന്തം നാട്ടില് യൂറോ ഫൈനലില് കിരീടം കൈവിട്ടുകളഞ്ഞതിന്റെ കണ്ണീര് ആ ചുണ കുട്ടന് ലോകകിരീടം കൊണ്ട് തുടയ്ക്കുന്നത് കാണാന് ലോകം കാത്തിരുന്നു. പക്ഷെ സെമിയില് സിദാന്റെ രണ്ടാം വരവിന് മുന്നില് റോണോയ്ക്ക് അഥവാ പോര്ച്ചുഗലിന് കീഴടങ്ങേണ്ടിവന്നു. അന്ന് തൊട്ട് ഇന്നുവരെയുള്ള ആറ് ലോകകപ്പുകളിലും ക്രിസ്റ്റിയാനോ റൊണാള്ഡോയും പോര്ച്ചുഗലും ലോകകപ്പിന്റെ ഭാഗമായിക്കൊണ്ടിരിക്കുകയാണ്. ശക്തമായ പ്രതീക്ഷയോട ആവേശത്തോടെ.
കൊളംബിയ
ഏഴാം തവണയാണ് കൊളംബിയ ലോകകപ്പ് കളിക്കാനെത്തുന്നത്. ആദ്യമായി കളിച്ചത് 1962ല്. 2014 ബ്രസീല് ലോകകപ്പില് ക്വാര്ട്ടര് വരെയെത്തിയതാണ് ഏറ്റവും വലിയ മുന്നേറ്റം. 1990, 2018 ലോകകപ്പുകളില് റൗണ്ട് ഓഫ് 16ലെത്തി.
ഉസ്ബെക്കിസ്ഥാന്
ഇത്തവണത്തെ കന്നി ടീമുകളിലൊന്ന് ഉസ്ബെക്കിസ്ഥാന് ആണ്. 1990 വരെ സോവിയറ്റ് യൂണിയന്റെ ഭാഗമായിരുന്നു. പിന്നീട് യോഗ്യതാ മത്സരങ്ങളിലൂടെ ശ്രമിച്ചിരുന്നെങ്കിലും പാസ് നേടാനായത് ഇത്തവണ മാത്രം.
ഡി ആര് കോംഗോ
രണ്ടാം തവണയാണ് ഡി ആര് ഗോംകോ ലോകകപ്പില് കളിക്കാനെത്തുന്നത്. ഇതിന് മുമ്പ് 1974ലെ ജര്മന് ലോകകപ്പില് കളിക്കുമ്പോള് ഈ രാഷ്ട്രത്തിന്റെ പേര് സായിറെ എന്നായിരുന്നു. 90കളുടെ മദ്ധയത്തിലാണ് ഡെമോക്രാറ്റിക് റിപ്പബ്ലിക് ഓഫ് കോംഗോ അഥവാ ഡി ആര് കോംഗോ എന്നായത്. 1974ല് ടീം ഗ്രൂപ്പ് സ്റ്റേജില് പുറത്തായി.
