ബൈക്കിൽ ചുറ്റികറങ്ങാൻ ഏറെ ഇഷ്ടമുള്ള ആളാണ് നടി മഞ്ജു വാര്യർ. ഒരു ബിഎംഡബ്ല്യു ആര്‍1250ജിഎസ് ബൈക്ക് തന്നെ മഞ്ജു സ്വന്തമാക്കിയിട്ടുണ്ട്. ഇപ്പോഴിതാ, ബൈക്കിൽ നഗരം ചുറ്റുന്ന മഞ്ജുവിന്റെ വീഡിയോ ആണ് ശ്രദ്ധ കവരുന്നത്. ധനുഷ് കോടിയിലൂടെയാണ് മഞ്ജുവിന്റെ സ്റ്റൈലൻ റൈഡ്. ഇരുന്നും നിന്നുമൊക്കെ ബൈക്ക് ഓടിക്കുന്ന മഞ്ജുവിനെ വീഡിയോയിൽ കാണാം.
വീഡിയോ വൈറലായതോടെ ഒട്ടേറെപ്പേർ കമന്റുകളുമായെത്തി. ടൊവിനോ തോമസ്, വിജയ് യേശുദാസ്, രമേഷ് പിഷാരടി തുടങ്ങിയ താരങ്ങളും കമന്റിട്ടിട്ടുണ്ട്. പ്രോപ്പർ റൈഡിങ്ങ് ഗിയറുകൾ ധരിച്ചാണ് മഞ്ജുവിന്റെ റൈഡ്.
ബി.എം.ഡബ്ല്യുവിന്റെ ബൈക്ക് നിരയിലെ ഏറ്റവും പ്രശസ്തമായ മോഡലുകളിലൊന്നാണ് അഡ്വഞ്ചർ ബൈക്കായ ആർ 1250 ജി.എസ്. 2023-ലാണ് മഞ്ജു ഈ മോഡൽ സ്വന്തമാക്കുന്നത്. അഡ്വഞ്ചര്‍ വിഭാഗത്തില്‍ പെടുന്ന ഈ ബിഎംഡബ്ല്യു ആര്‍1250ജിഎസ് ബൈക്ക് ഏകദേശം 28 ലക്ഷം രൂപ മുടക്കിയാണ് മഞ്ജു സ്വന്തമാക്കിയത്.
തമിഴ് സൂപ്പര്‍താരം അജിത്ത് കുമാര്‍ ലഡാക്കിലേക്ക് നടത്തിയ 2500 കി.മീ. ലഡാക്ക് ബൈക്ക് ട്രിപ്പില്‍ മഞ്ജുവും ഒപ്പമുണ്ടായിരുന്നു. ഈ യാത്രയ്‌ക്ക് ശേഷമാണ് സ്വന്തമായി ബൈക്ക് ഓടിക്കണമെന്ന ആഗ്രഹം തോന്നിയെന്ന് മഞ്ജു വാര്യർ അഭിമുഖങ്ങളിൽ പറഞ്ഞിരുന്നു. അതിനു ശേഷമാണ് ബൈക്ക് ഓടിക്കാനുള്ള ലൈസൻസ് മഞ്ജു നേടിയെടുത്തതും.
1254 സി.സി. ട്വിൻ സിലിണ്ടർ ബോക്സർ എൻജിനാണ് ഈ വാഹനത്തിന് കരുത്തേകുന്നത്. 136 എച്ച്.പി. പവറും 143 എൻ.എം. ടോർക്കുമാണ് എൻജിൻ ഉത്പാദിപ്പിക്കുന്ന കരുത്ത്.
ജര്‍മ്മന്‍ ആഡംബര ഇരുചക്ര വാഹന ബ്രാന്‍ഡായ ബിഎംഡബ്ല്യു മോട്ടറാഡ് ബിഎംഡബ്ല്യു ആര്‍ 1250 ജിഎസ്, ആര്‍ 1250 ജിഎസ് അഡ്വഞ്ചര്‍ എന്നീ മോട്ടോര്‍സൈക്കിളുകള്‍ ഇന്ത്യന്‍ വിപണിയില്‍ അവതരിപ്പിച്ചിരുന്നു. യഥാക്രമം 20.45 ലക്ഷം രൂപയിലും 22.40 ലക്ഷം രൂപയിലുമാണ് ഇന്ത്യ എക്സ് ഷോറൂം വില ആരംഭിക്കുന്നത്.
