ന്യൂദല്ഹി: പ്രിയങ്കഗാന്ധിയെ കോണ്ഗ്രസിന്റെ തലപ്പത്തേക്ക് കൊണ്ടുവരുന്ന ചര്ച്ചകള് കോണ്ഗ്രസിനുള്ളില് ഉയരുന്നത് രാഹുല് ഗാന്ധിയുടെ അറസ്റ്റ് ഭയന്നിട്ടാണെന്ന് ചില റിപ്പോര്ട്ടുകള് പുറത്തുവരുന്നു. നാഷണല് ഹെറാള്ഡ് പത്രവുമായി ബന്ധപ്പെട്ട സാമ്പത്തിക തട്ടിപ്പുകേസുകളില് രാഹുല് ഗാന്ധി അകത്താകാമെന്ന ചര്ച്ചകള് ഉയര്ന്നതോടെ കോണ്ഗ്രസ് തലപ്പത്തുള്ള നെഹ്രുകുടുംബത്തിന്റെ ആധിപത്യം പോകാതിരിക്കാനാണ് പകരം പ്രിയങ്ക നേതാവാകണമെന്ന ചര്ച്ചകള് ബോധപൂര്വ്വം പാര്ട്ടിക്കുള്ളില് ഉയര്ത്തുന്നതെന്ന് ചൂണ്ടിക്കാണിക്കപ്പെടുന്നു.
മാത്രമല്ല, ഈയിടെ ജര്മ്മനിയില് പോയ രാഹുല് ഗാന്ധി എല്ലാ അതിരും വിടുന്ന രീതിയില് രാജ്യദ്രോഹപരമായ പ്രസംഗങ്ങളും പ്രസ്താവനകളും ആണ് നടത്തിയത്. രാജ്യദ്രോഹം എന്ന വിഭാഗത്തില് പെടുത്താവുന്ന കുറ്റങ്ങളാണ് രാഹുല് ഗാന്ധി ചെയ്തത്. ഇന്ത്യയില് വോട്ടുചോരി നടക്കുന്നുണ്ടെന്നും അങ്ങിനെയാണ് ഇന്ത്യയില് അധികാരത്തില് ഉള്ള മോദി സര്ക്കാര് ഭരിയ്ക്കുന്നതെന്നും ഉള്പ്പെടെ ഒട്ടേറെ രാജ്യദ്രോഹപരമായ കാര്യങ്ങള് രാഹുല്ഗാന്ധി ജര്മ്മനിയില് ഉയര്ത്തിയിരുന്നു. ഉല്പാദന രംഗത്ത് കുതിക്കുന്ന ഇന്ത്യയ്ക്കെതിരെ ഇന്ത്യയുടെ ഉല്പാദനരംഗം മന്ദീഭവിച്ചുവെന്ന് വരെ രാഹുല് പ്രസ്താവിക്കുകയുണ്ടായി. ഇതിന് പുറമെയാണ് നരേന്ദ്രമോദി സര്ക്കാരിനെ അട്ടിമറിക്കാന് തുനിഞ്ഞിറങ്ങിയിരിക്കുന്ന അമേരിക്കന് ശതകോടീശ്വരന് ജോര്ജ്ജ് സോറോസിന്റെ ഒരു പിടി അനുയായികളുമായി രാഹുല് ഗാന്ധി ജര്മ്മനിയില് നടത്തിയ കൂടിക്കാഴ്ചകള്. എന്തെന്ത് രാജ്യദ്രോഹപരമായ ടൂള്കിറ്റുകളാണ് ഇവര് ചര്ച്ചാവിഷയമാക്കിയത് എന്നതില് ആശങ്കയുണ്ട്. ഇതുപോലെ ഒരു രാജ്യത്തെ ഭരണം അട്ടിമറിക്കാനുള്ള പ്രവര്ത്തനങ്ങളുമായി മുന്നോട്ടുപോകുന്ന രാഹുല് ഗാന്ധിയുടെ പ്രവര്ത്തനങ്ങളോട് എങ്ങിനെയാണ് മോദി സര്ക്കാര് പ്രതികരിക്കുക എന്ന ആശങ്ക കോണ്ഗ്രസിനകത്ത് തന്നെ ഉണ്ടെന്ന് കരുതുന്നു. വോട്ട് ചോരി പോലുള്ള ഇല്ലാത്ത ആരോപണങ്ങള് ഉയര്ത്തുന്നതിന്റെ പേരിലും ചിലപ്പോള് രാഹുലിന്റെ പിടിച്ച് ജയിലിലിടാനും സാധ്യതയുണ്ടെന്നും കോണ്ഗ്രസിനകത്തെ വിദഗ്ധര് തന്നെ ആശങ്കപ്പെടുന്നുണ്ട്.
ഇതോടെയാണ് രാഹുല് ഗാന്ധിയ്ക്ക് അങ്ങിനെ എന്തെങ്കിലും സംഭവിച്ചാല് കോണ്ഗ്രസ് പാര്ട്ടിക്ക് നേതൃത്വം നല്കാന് പകരക്കാരനാര് എന്ന ചര്ച്ചയേ ഉയര്ന്നുകൂടാ എന്ന് നെഹ്രു കുടുംബം ശഠിക്കുന്നു. അതിനാലാണ് പ്രിയങ്ക ഗാന്ധിയെ കോണ്ഗ്രസ് നേതൃപദവിയിലേക്ക് ഉയര്ത്തണം എന്ന രീതിയിലുള്ള ചര്ച്ചകള്ക്ക് ചില കോണ്ഗ്രസ് പ്രാദേശിക നേതാക്കള് വഴി നെഹ്രു കുടുംബം തുടക്കമിടുന്നതെന്ന് ചില രാഷ്ട്രീയ നിരീക്ഷകര് ചൂണ്ടിക്കാട്ടുന്നു.
