മഹാദേവൻ തമ്പിയുടെ രണ്ട് മലയാള കൃതികൾ ഇംഗ്ലീഷിലേക്ക് വിവർത്തനം ചെയ്ത് ലണ്ടനിൽ പുറത്തിറക്കി

ലണ്ടൻ: മലയാള ഭാഷയ്‌ക്ക് പുതുവത്സര സമ്മാനമായി ലണ്ടനിലെ ടൈം ലെജൻഡ് ഗ്രൂപ്പ് പ്രശസ്ത സാഹിത്യകാരൻ എസ്. മഹാദേവൻ തമ്പിയുടെ രണ്ട് മലയാള കൃതികൾ ഇംഗ്ലീഷിലേക്ക് വിവർത്തനം ചെയ്ത് ലണ്ടനിൽ പുറത്തിറക്കി.

രാധിക പി. മേനോൻ Death Sutra എന്ന പേരിൽ ഇംഗ്ലീഷിലേക്ക് മൊഴിമാറ്റിയ തമ്പിയുടെ പ്രശസ്ത നോവൽ മൃത്യുസൂത്രംയും, പി. മുരളീധരനും എം. ശ്രീനന്ദനും ചേർന്ന് വിവർത്തനം ചെയ്ത തമ്പിയുടെ തെരഞ്ഞെടുത്ത കഥകളുടെ സമാഹാരമായ Weeping Needleഉം ഒരേ ദിവസം പുറത്തിറങ്ങി. മലയാളത്തിലെ ഒരു എഴുത്തുകാരന്റെ രണ്ട് കൃതികൾ ഒരേ ദിവസം ലണ്ടനിൽ പ്രകാശനം ചെയ്യപ്പെടുന്നത് ഇതാദ്യമായാണ്.

കഴിഞ്ഞ ഒരു വർഷത്തിനുള്ളിൽ ഹിന്ദി ഉൾപ്പെടെ നിരവധി ഇന്ത്യൻ ഭാഷകളിലേക്ക് വിവർത്തനം ചെയ്യപ്പെട്ട മൃത്യുസൂത്രം അബുദാബി ശക്തി അവാർഡും ദേവസ്വം ബോർഡിന്റെ മാധവ മുദ്ര പുരസ്കാരവും നേടിയിട്ടുണ്ട്. തമ്പിയുടെ മികച്ച ഒരു ഡസൻ കഥകളുടെ ഇംഗ്ലീഷ് വിവർത്തന സമാഹാരമാണ് Weeping Needle.

കഴിഞ്ഞ വർഷങ്ങളിൽ ഇംഗ്ലീഷിൽ പ്രസിദ്ധീകരിച്ച തമ്പിയുടെ Azadi, Purge, Evicted from Heaven എന്നീ കൃതികൾ അന്താരാഷ്‌ട്ര വായനക്കാരിൽ നിന്ന് വ്യാപക പ്രശംസ നേടിയിരുന്നു. പുതിയ പുസ്തകങ്ങളുടെ സൗത്ത് ഏഷ്യൻ എഡിഷൻ ജനുവരിയിൽ തന്നെ ന്യൂഡൽഹിയിലെ കൊണാരക് പബ്ലിഷേഴ്സ് ഇന്ത്യയിൽ ലഭ്യമാക്കുമെന്ന് പ്രസാധകർ അറിയിച്ചു.

മഹാദേവൻ തമ്പി കേന്ദ്ര സാഹിത്യ അക്കാഡമിയുടെ ഭരണസമിതിയംഗമാണ്. അശാന്തമായ ശ്രീലങ്കൻ സമുദ്രങ്ങളുടെ ആഴച്ചുഴികളെ പശ്ചാത്തലമാക്കി എഴുതിയ അലകളില്ലാത്ത കടൽ എന്ന നോവൽ അദ്ദേഹത്തിന്റെ ശ്രദ്ധേയ കൃതികളിലൊന്നാണ്. ജലപർവം മലയാളത്തിലെ ആദ്യത്തെ പരിസ്ഥിതി നോവലായാണ് വിലയിരുത്തപ്പെടുന്നത്. കാശ്മീരിന്റെ പശ്ചാത്തലത്തിൽ രചിച്ച ആസാദി എന്ന നോവൽ അഞ്ച് ഭാഷകളിലേക്ക് വിവർത്തനം ചെയ്യപ്പെട്ടിട്ടുണ്ട്. എന്റെ നീല സമുദ്രം എന്ന നോവലും ഏറെ ചർച്ച ചെയ്യപ്പെട്ട കൃതിയാണ്.

കണ്ടൽക്കാട്, അധിനിവേശം, അതിരുകൾ, ശിശിരത്തിലെ സൂര്യൻ, ആകാശങ്ങളുടെ അവകാശികൾ എന്നിവയാണ് പ്രധാന കഥാസമാഹാരങ്ങൾ. സംസ്ഥാന ബാലസാഹിത്യ ഇൻസ്റ്റിറ്റ്യൂട്ട് അവാർഡും ഉറൂബ് അവാർഡും അദ്ദേഹത്തെ തേടിയെത്തിയിട്ടുണ്ട്.

മുതുകുളമാണ് ജന്മദേശമെങ്കിലും ഏറെക്കാലമായി തിരുവനന്തപുരമാണ് അദ്ദേഹത്തിന്റെ പ്രവർത്തനമണ്ഡലം. ഡൽഹി സർവകലാശാലയിൽ നിന്ന് ജേർണലിസത്തിലും ധനതത്വശാസ്ത്രത്തിലും ബിരുദം നേടിയ അദ്ദേഹം ഇൻഫർമേഷൻ വകുപ്പിൽ അഡീഷണൽ ഡയറക്ടറായി സേവനമനുഷ്ഠിച്ചിട്ടുണ്ട്. എസ്.ബി.ഐയിൽ നിന്ന് വിരമിച്ച ശ്രീകുമാരിയാണ് ഭാര്യ. മംഗളൂരു വിമാനത്താവള മാനേജർ അരുൺ മഹാദേവൻ, ഡോ. അമ്മു ശ്രീപാർവതി എന്നിവരാണ് മക്കൾ.