ചെങ്ങന്നൂര്: ജന്മനാട്ടില് കിട്ടിയ ബാല്യകാല അനുഭവങ്ങളാണ് മാനവികതയിലൂന്നി എല്ലാവരെയും ഉള്ക്കൊള്ളാന് സഹായകമായതെന്ന് അഡ്വ. പി.എസ്. ശ്രീധരന്പിള്ള. വെണ്മണി മാര്ത്തോമ ഹയര് സെക്കന്ഡറി സ്കൂള് ലൈബ്രറിക്ക് പുസ്തക സമര്പ്പണവും പുതിയ പുസ്തകങ്ങളുടെ പ്രകാശനവും നിര്വഹിക്കുന്ന ചടങ്ങില് ആമുഖ പ്രസംഗം നടത്തുകയായിരുന്നു അദ്ദേഹം.
ജനാധിപത്യ രാജ്യത്ത് വ്യത്യസ്തമായ രാഷ്ട്രീയപാര്ട്ടികളുണ്ടാകും. വിഭിന്നങ്ങളായ മതങ്ങളും ഭാഷകളുമുണ്ടാകും. പക്ഷേ നാനാത്വത്തില് ഏകത്വത്തിന്റെ അടിത്തറ എന്ന് പറയുന്നത് നമ്മുടെ ജനാധിപത്യത്തിന്റെ സംസ്കാരമാണ്. അതിനെ ഉള്ക്കൊള്ളാന് നമുക്ക് സാധിക്കണമെന്ന് അദ്ദേഹം പറഞ്ഞു.
രാജ്യത്തെ 140 കോടി ജനങ്ങളും ഒരേ പാര്ട്ടിയില്പെട്ടവരായാല് ജനാധിപത്യത്തിന് അര്ത്ഥമില്ല. വ്യത്യസ്തതയെ മാനിക്കുന്നതാണ് ജനാധിപത്യം. രാഷ്ട്രീയത്തെ എതിര്ക്കാം, എന്നാല് വ്യക്തികളെ തേജോവധം ചെയ്യുന്ന വാദങ്ങളും വിവാദങ്ങളും അരങ്ങുതകര്ക്കുന്ന സംസ്ഥാനമായി കേരളം മാറുന്നത് മാറ്റിയെടുക്കാന് നേതാക്കള്ക്ക് സാധിക്കണം, ശ്രീധരന്പിള്ള പറഞ്ഞു. അച്ഛന് വി.ജി. സുകുമാരന്നായരുടെ ഓര്മയ്ക്കായി കുടുംബം സ്കൂള് ലൈബ്രറിക്ക് രണ്ട് ലക്ഷം രൂപയുടെ പുസ്തകങ്ങളാണ് നല്കിയത്.
അമ്മ പി. ഭവാനിയമ്മയുടെ 95-ാം ജന്മദിനത്തില്, ശ്രീധരന്പിള്ള രചിച്ച 270-ാമത് കവിതാ സമാഹാരമായ മൃദുരവങ്ങള്, 269-ാമത് പുസ്തകമായ ദക്ഷിണേന്ത്യന് ക്ഷേത്രങ്ങളിലൂടെ എന്ന യാത്രാവിവരണം എന്നിവ അമ്മയുടെ കാല്ക്കല് സമര്പ്പിച്ച ശേഷമായിരുന്നു പ്രകാശനം. മിസോറാം മുന് ഗവര്ണര് കുമ്മനം രാജശേഖരന് മുഖ്യാതിഥിയായിരുന്നു.
