തിരുവനന്തപുരം: മോഹന്‍ലാലിന്റെ അമ്മ ശാന്തകുമാരി അമ്മയ്ക്ക് അന്ത്യാഞ്ജലി. എറണാകുളം എളമക്കരയിലെ വസതിയില്‍ നിന്ന് പുലര്‍ച്ചെ ആറുമണിയോടെ തിരുവനന്തപുരം മുടവന്‍മുഗളിലെ കേശവദേവ് റോഡിലുള്ള ‘ഹില്‍വ്യൂ’ വസതിയിലെത്തിച്ചു. മോഹന്‍ലാലിന്റെ അച്ഛന്‍ കെ. വിശ്വനാഥന്‍ നായരും സഹോദരന്‍ പ്യാരേലാലും അന്ത്യനിദ്രകൊള്ളുന്ന ഹില്‍വ്യൂവിലെ വീട്ടുവളപ്പില്‍ വൈകിട്ട് നാലുമണിയോടെ ശാന്തകുമരിക്കും അന്ത്യവിശ്രമം ഒരുക്കി.
ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍, മുഖ്യമന്ത്രി പിണറായി വിജയന്‍, കേന്ദ്രമന്ത്രി സുരേഷ്‌ഗോപി, മന്ത്രിമാര്‍, ഡിജിപി റവാഡ ചന്ദ്രശേഖര്‍, ആര്‍എസ്എസ് മുതിര്‍ന്ന പ്രചാരകന്‍ എസ്. സേതുമാധവന്‍, ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിന് വേണ്ടി സംസ്ഥാന ജനറല്‍ സെക്രട്ടറി അഡ്വ. എസ്. സുരേഷ്, മേയര്‍ വി.വി. രാജേഷ്, ഡെപ്യൂ
ട്ടി മേയര്‍ ആശാനാഥ്, ജന്മഭൂമിക്ക് വേണ്ടി ഡയറക്ടര്‍ ടി. ജയചന്ദ്രന്‍, ഗോകുലം ഗോപാലന്‍, ജോര്‍ജ് ഓണക്കൂര്‍ തുടങ്ങി സമൂഹത്തിന്റെ വിവിധ മേഖലകളിലുള്ളവര്‍ അന്തിമോപചാരമര്‍പ്പിച്ചു.
വൈകിട്ട് മൂന്നുമണിയോടെ ഹരേരാമ മന്ത്രത്തിന്റെ അകമ്പടിയില്‍ മോഹന്‍ലാലും ബന്ധുക്കളും അന്ത്യകര്‍മങ്ങള്‍ ചെയ്തു. നാലുമണിയോടെ മോഹന്‍ലാല്‍ ചിതയിലേക്ക് അഗ്നിപകര്‍ന്നു.
