വര്‍ക്കല: ഭാരതീയ ഗുരു പരമ്പരയില്‍ അവതരിച്ച മഹര്‍ഷി ആണ് ശ്രീ നാരായണ ഗുരുവെന്ന് ബീഹാര്‍ ഗവര്‍ണര്‍ ആരിഫ് മുഹമ്മദ് ഖാന്‍. ആദിയോഗിയില്‍ ആരംഭിച്ച ഭാരതീയ ഗുരു പരമ്പരയിലെ ഓരോ മഹത് വ്യക്തിയും സ്വന്തം ജീവിതം സമര്‍പ്പിച്ചത് അതത് കാലത്തെ ധര്‍മ്മം നിലനിര്‍ത്താന്‍ വേണ്ടി ആയിരുന്നുവെന്നും അദ്ദേഹം പറഞ്ഞു. തൊണ്ണൂറ്റി മൂന്നാമത് ശിവഗിരി തീര്‍ഥാടനത്തിലെ ഉദ്ഘാടന സമ്മേളനത്തില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം.
ഈ പ്രപഞ്ചത്തിന്റെ നിലനില്പ് ധര്‍മ്മത്തിലാണ് എന്നാണ് ഭാരതീയ ദര്‍ശനം പറയുന്നത്. പ്രപഞ്ചത്തിലെ ഓരോ ഘടകവും യോജിച്ച് നില്‍ക്കുമ്പോള്‍ ആണ് ധാര്‍മ്മികതയും ലോക ക്രമവും പുലരുന്നത്. ശ്രീ നാരായണ ഗുരുവിന്റെ ഓരോ സന്ദേശത്തിലും പ്രവൃത്തിയിലും നാം കണ്ടത് അദ്ദേഹത്തിന്റെ ധാര്‍മികതയുടെ തിളക്കമാണ്. ഗുരുധര്‍മ്മത്തിന്റെ പരമമായ ലക്ഷ്യം തന്നെ ഒരു സാര്‍വ ലൗകിക ക്രമത്തിന്റെ സൃഷ്ടി ആയിരുന്നു. ആത്മീയതയിലൂടെ അദ്ദേഹം വിഭാവനം ചെയ്ത ആ ലോക ക്രമത്തിന്റെ മുഖമുദ്ര സമത്വവും സാഹോദര്യവുമാണ്.
ഗുരുവിന്റെ കാലത്ത് സമൂഹത്തില്‍ നില നിന്നത് കടുത്ത ജാതീയ അനീതി ആയിരുന്നു. ദാര്‍ശനികന്‍ എന്ന നിലയില്‍ ഈ അനീതികള്‍ക്ക് പരിഹാരം കാണുക എന്ന ദൗത്യം ഗുരു ഏറ്റെടുത്തു. സമൂഹത്തിലെ കൊടിയ അനീതികളെ സൗമ്യം ആയി നേരിട്ട് ജയിക്കാന്‍ ഉള്ള ഊര്‍ജം ഗുരുവിന് നല്‍കിയത് ധാര്‍മ്മികത ആയിരുന്നു. ആ ധാര്‍മ്മികതയെ ഗുരുദേവന്‍ ഒരിക്കല്‍ പോലും ലംഘിച്ചില്ല. സമത്വവും സാഹോദര്യവും എക്കാലവും നിലനില്‍ക്കണം എങ്കില്‍ ഗുരുവിന്റെ പാതയിലൂടെ തന്നെ നാം മുന്നോട്ട് പോകണം.അതിനുള്ള ഓര്‍മ്മപ്പെടുത്തല്‍ ആണ് ഓരോ ശിവഗിരി തീര്‍ത്ഥാടനവുമെന്നും അദ്ദേഹം പറഞ്ഞു.
