കൊല്‍ക്കത്ത : മദ്രസ വിദ്യാഭ്യാസ സമ്പ്രദായത്തില്‍, എല്ലാ മതങ്ങളെയും ബഹുമാനിക്കാന്‍ പഠിപ്പിക്കണമെന്നും തീവ്ര ഇസ്ലാമികവത്കരണ ആശയങ്ങള്‍ ഉപേക്ഷിക്കുകയും വേണ്ടതുണ്ടെന്ന് ആര്‍ എസ് എസ് സര്‍ സംഘ ചാലക് ഡോ. മോഹന്‍ ഭഗവത്.ഇതില്‍ സര്‍ക്കാരിന് കഴിയുന്നത് ചെയ്യണം.
ചിലര്‍ തന്റെ ഈ അഭിപ്രായം ശരിയാണെന്ന് പറയുന്നുണ്ട്.ചില മദ്രസകളില്‍ ആധുനിക വിദ്യാഭ്യാസവും ഭാരതത്തെ കുറിച്ച് പഠിപ്പിക്കാനും ആരംഭിച്ചിട്ടുണ്ട്. എന്നാല്‍ എല്ലായിടത്തും അത് ചെയ്യുന്നില്ലെന്നും ഡോ മോഹന്‍ ഭഗവത് പറഞ്ഞു.
അസം സര്‍ക്കാര്‍ ഇത് പ്രയോഗത്തില്‍ വരുത്തി.ഇത്തരം വിഷയങ്ങള്‍ പഠിപ്പിച്ചാല്‍ മാത്രമേ ഗ്രാന്റുകള്‍ നല്‍കൂ എന്ന് സര്‍ക്കാര്‍ നിലപാടെടുത്തിട്ടുണ്ട്. ഏകദേശം 30 ശതമാനം പേര്‍ ഇതിനോട് യോജിക്കുന്നില്ല. മദ്രസ എന്നത് മത വിദ്യാഭ്യാസം നല്‍കാനാണ് ഉദ്ദേശിക്കുന്നത്. അതില്‍ ഒരു പ്രശ്‌നവുമില്ല. ഭാരതത്തില്‍, മതസ്വാതന്ത്ര്യമുണ്ട്. എന്നാല്‍ ആധുനിക വിദ്യാഭ്യാസത്തോടൊപ്പം ദേശീയ വിദ്യാഭ്യാസവും നല്‍കണം. നാമെല്ലാവരും ഒരുമിച്ച് ജീവിക്കണം. എല്ലാവരെയും ബഹുമാനിക്കണം.
ഭരണപരമായ നടപടികള്‍ സ്വീകരിച്ചാല്‍ മാറ്റം വരും. മനസുകളെ രൂപപ്പെടുത്തുക എന്ന ദൗത്യം നമുക്കെല്ലാവര്‍ക്കും ചെയ്യാന്‍ കഴിയുമെന്നും സര്‍സംഘ് ചാലക് പറഞ്ഞു.
സംഘയാത്രയുടെ 100 വര്‍ഷങ്ങള്‍; പുതിയ ചക്രവാളങ്ങള്‍ എന്ന പ്രഭാഷണ പരമ്പരയില്‍ ചോദ്യങ്ങള്‍ക്ക് മറുപടി നല്‍കവെയാണ് ഡോ മോഹന്‍ ഭഗവത് ഇങ്ങനെ പറഞ്ഞത്.
