കണ്ണൂർ: ഇൻസ്റ്റഗ്രാമിൽ നാടൻ ബോംബ് ഉപയോഗിക്കുന്ന റീൽ ഇട്ടതിന് താഴെ കൊലവിളി നടത്തിയ സംഭവത്തിൽ കണ്ണൂർ സൈബർ പോലീസ് കേസെടുത്തു. ഇടത് അനുകൂല അക്കൗണ്ട് എന്ന് കരുതപ്പെടുന്ന ” റെഡ് ആർമി കണ്ണൂർ’ എന്ന ഇൻസ്റ്റഗ്രാം അക്കൗണ്ടിലാണ് നാടൻ ബോംബ് ഉപയോഗിക്കുന്ന വീഡിയോ ഇട്ടത്. ഈ വീഡിയോയ്‌ക്ക് താഴെ പരസ്പരം കൊലവിളിയും ഭീഷണിയും മുഴക്കി കമന്റുകൾ ഇട്ട സിപിഎം, മുസ്ലീം ലീഗ് പ്രവർത്തകർക്കെതിരെയും അന്വേഷണം ആരംഭിച്ചു.
തദ്ദേശ സ്വയംഭരണ തിരഞ്ഞെടുപ്പിൽ പാനൂർ കുന്നോത്ത്പറമ്പ് പഞ്ചായത്ത് യുഡിഎഫ് പിടിച്ചെടുത്തതിന് പിന്നാലെ മേഖലയിൽ രാഷ്‌ട്രീയ സംഘർഷങ്ങൾ നിലനിന്നിരുന്നു. ഇതിനിടയിലാണ് ഡിസംബർ 16-ന് റെഡ് ആർമി അക്കൗണ്ടിൽ ബോംബ് പൊട്ടുന്ന ദൃശ്യങ്ങൾ പ്രത്യക്ഷപ്പെട്ടത്. “കണ്ണൂരിലെ കണ്ണായ പാനൂരിലെ സഖാക്കളാരും കാശിക്ക് പോയിട്ടില്ലെന്ന് ഓർമിപ്പിക്കുന്നു” എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തത്.
സിറ്റി പോലീസ് കമ്മീഷണർക്ക് സ്പെഷ്യൽ ബ്രാഞ്ച് സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് സൈബർ പൊലിസ് നടപടി. കലാപത്തിന് ആഹ്വാനം ചെയ്യുക, സ്പർധ വളർത്തുന്ന തരത്തിൽ ഇടപെടുക (ഭാരതീയ ന്യായ സംഹിത സെക്ഷൻ 192) തുടങ്ങിയ കുറ്റങ്ങളാണ് ചുമത്തിയിരിക്കുന്നത്.
