തിരുവനന്തപുരം: ശബരിമല സ്വര്ണക്കൊളള കേസിലെ പ്രതി ഉണ്ണിക്കൃഷ്ണന് പോറ്റിയും മുന് ദേവസ്വം മന്ത്രി കടകം പള്ളി സുരേന്ദ്രനും ഒരുമിച്ചുള്ള ഫോട്ടോ പുറത്തു വിട്ട് ആര് എസ് പി സംസ്ഥാന സെക്രട്ടറി ഷിബു ബേബി ജോണ്. ഈ ചിത്രത്തില് മുഖ്യമന്ത്രിക്ക് ദുരൂഹത തോന്നുന്നില്ലേയെന്നും ചോദ്യമുന്നയിച്ചു.
ഫേസ്ബുക്കിലൂടെയാണ് ഷിബു ബേബി ജോണ് ഫോട്ടോ പുറത്തു വിട്ട് കുറിപ്പും പങ്കു വച്ചത്. ഈ സൗഹൃദ കൂട്ടായ്മയുടെ ഉദ്ദേശം എന്തായിരുന്നു. ഉന്നത പൊലീസ് ഉദ്യോഗസ്ഥനെ ഇരുത്തി എന്താണ് ചര്ച്ച ചെയ്തതെന്നും ചോദിക്കുന്നു. മുഖ്യമന്ത്രി ഇതും അന്വേഷിക്കുമോ എന്നറിയാന് ആകാംക്ഷയുണ്ട്.
ഉണ്ണികൃഷ്ണന് പോറ്റി സോണിയ ഗാന്ധിയുമായി നില്ക്കുന്ന ചിത്രത്തില് മുഖ്യമന്ത്രിക്ക് ദുരൂഹത തോന്നുമ്പോള് ഈ ചിത്രത്തിലും ദുരൂഹത തോന്നേണ്ടതല്ലേ?പോറ്റി സോണിയ ഗാന്ധിയെ കണ്ടപ്പോഴല്ല ശബരിമലയില് മോഷണം നടന്നത്. സോണിയ ഗാന്ധി വിചാരിച്ചാല് ഒരാളെയും ശബരിമലയില് കയറ്റാനും കഴിയില്ല. മറിച്ച് ഈ ചിത്രത്തില് പോറ്റിക്കൊപ്പം നില്ക്കുന്ന മഹാന് ദേവസ്വം മന്ത്രി ആയിരുന്നപ്പോഴാണ് ശബരിമലയിലെ സ്വര്ണം പമ്പ കടന്നുപോയത്.
ഇവര് ഇരിക്കുന്നത് ബാംഗ്ലൂര് എയര്പോര്ട്ടില് ആണെന്ന് തോന്നുന്നു. കടകംപള്ളിയും പോറ്റിയും തമ്മില് എന്താണ് ഇടപാട്? കൂടെ ഇരിക്കുന്ന ഉന്നത പൊലീസ് ഉദ്യോഗസ്ഥന് ഇവരുമായി എന്താണ് ബന്ധം? മുഖ്യമന്ത്രിക്ക് എന്തുകൊണ്ടാണ് ഇതില് യാതൊരു ദുരൂഹതയും തോന്നാത്തത്?- ഷിബു ബേബിജോണ് കുറിച്ചു.
