ലോകമെമ്പാടുമുള്ളവർ ക്രിസ്മസിനെ വരവേല്ക്കാന് ഒരുങ്ങിക്കഴിഞ്ഞു. വൈനിന്റെയും കേക്കിന്റെയും നറുമണം പരക്കുന്ന മഞ്ഞുമൂടിയ രാത്രികൾ. ലൈറ്റുകള് കൊണ്ട് അലങ്കരിച്ചും ക്രിസ്മസ് കച്ചവടങ്ങളുമെല്ലാമായി തെരുവുകളെല്ലാം ആവേശത്തിലാണ്. മഞ്ഞിന്റെ കുളിര്, നക്ഷത്രങ്ങളുടെ തിളക്കം, പുല്ക്കൂടിന്റെ പുതുമ, പാതിരാകുര്ബാനയുടെ പവിത്രത- പറഞ്ഞാലും പറഞ്ഞാലും തീരാത്ത വിശേഷണങ്ങളുമായി പടി കടന്നെത്തിയിരിക്കുകയാണ് ക്രിസ്മസ് രാവുകള്. ഈ വർഷത്തെ ക്രിസ്മസ് ആഘോഷങ്ങൾക്ക് മാറ്റുകൂട്ടാൻ നമുക്കും തയാറാക്കാം വെറൈറ്റി വിഭവങ്ങൾ.
ബർമീസ് മുട്ട മസാല
പുഴുങ്ങിയ മുട്ട – 6
സവാള – 1
വെളുത്തുള്ളി – 10 അല്ലി
നാരങ്ങാ നീര് – 1 ടീസ്പൂൺ
വറ്റൽ മുളക് – 2
ഉപ്പ് – ആവശ്യത്തിന്
മല്ലിയില – രണ്ടു തണ്ട്
എണ്ണ – വറുക്കാൻ ആവശ്യത്തിന്
മുട്ട പുഴുങ്ങുക, സവാള നീളത്തിൽ അരിഞ്ഞത് എണ്ണയിൽ വറുത്തു കോരുക, അതേ എണ്ണയിൽ തന്നെ നീളത്തിൽ അരിഞ്ഞ വെളുത്തുള്ളി വറുത്തു കോരുക, വറ്റൽ മുളക് വറുക്കുക. വറുത്ത സവാള, വെളുത്തുള്ളി, വറ്റൽ മുളക് എന്നിവ കൈ കൊണ്ട് പൊടിച്ചു യോജിപ്പിക്കുക. ഒരു മുട്ട എടുത്തു നടുവിലൂടെ ചെറുതായി മുറിക്കണം, രണ്ടു കഷ്ണം ആയി മാറ്റാൻ പാടില്ല. മുട്ടയുടെ വിടവിൽ യോജിപ്പിച്ച സവാള മിക്സ് നിറക്കുക, അതിൽ നാരങ്ങാ നീര്, വെള്ളത്തിൽ ചാലിച്ച ഉപ്പ്, സവാള വറുത്ത എണ്ണ കുറേശ്ശേ ചേർത്ത് കൊടുക്കുക. ഏറ്റവും മുകളിൽ പൊടിയായി അരിഞ്ഞ മല്ലിയില കൂടി വച്ച് അലങ്കരിക്കുക.
ക്രീമി ചിക്കൻ കറി
ചിക്കൻ – 1 kg
സവാള – 3
ഇഞ്ചി-വെളുത്തുള്ളി പേസ്റ്റ് ഫ്രഷ് ആയി അരച്ചെടുത്തത് – 1 ടേബിൾ സ്പൂൺ
പച്ചമുളക് – 3
ക്യാഷ്യൂ നട്ട് / ബദാം – 15 എണ്ണം
മുളക് പൊടി – 1 ടേബിൾ സ്പൂൺ
മല്ലി പൊടി – 1.5 ടേബിൾ സ്പൂൺ
മഞ്ഞൾ പൊടി – അര ടീസ്പൂൺ
പെരുംജീരക പൊടി – 1 ടീസ്പൂൺ
ജീരക പൊടി – അര ടീസ്പൂൺ
കുരുമുളക് പൊടി – 1 ടീസ്പൂൺ
കറുവപ്പട്ട, ഏലക്ക, ഗ്രാമ്പൂ, ബേ ലീഫ്
മല്ലിയില
നാരങ്ങാ നീര് – പകുതി
കസൂരി മേത്തി
ഫ്രഷ് ക്രീം ഉണ്ടാക്കാൻ ആയിട്ട്
പാൽ – മുക്കാൽ ഗ്ലാസ്
മൈദാ – അര ടേബിൾ സ്പൂൺ
ബട്ടർ – ഒരു ടേബിൾ സ്പൂൺ
പഞ്ചസാര – ഒരു നുള്ള്
കഴുകി വൃത്തിയാക്കിയ ചിക്കൻ കഷണങ്ങളിൽ ഇഞ്ചി-വെളുത്തുള്ളി പേസ്റ്റ്, മുളക് പൊടി, മല്ലിപ്പൊടി, മഞ്ഞൾ പൊടി, പെരുംജീരക പൊടി, ജീരക പൊടി, കുരുമുളക് പൊടി, നാരങ്ങാ നീര്, ആവശ്യത്തിന് ഉപ്പ് ചേർത്ത് നല്ല പോലെ മിക്സ് ചെയ്തു ഒരു രണ്ടു മണിക്കൂർ മാരിനേറ്റ് ചെയ്യാൻ വയ്ക്കുക.
സവാള അരിഞ്ഞത്, പച്ചമുളക്, ക്യാഷ്യൂ നട്ട് / ബദാം കുറച്ചു വെള്ളം ഒഴിച്ച് വേവിക്കുക. നല്ല പോലെ തണുക്കുമ്പോൾ മിക്സിയുടെ ജാറിൽ ഇട്ടു അരച്ചെടുക്കുക.
ഒരു പാനിൽ എണ്ണ ഒഴിച്ച് ചൂടാകുമ്പോൾ കറുവപ്പട്ട, ഏലക്ക, ഗ്രാമ്പൂ, ബേ ലീഫ് ഇട്ട് ഇളക്കുക. മാരിനേറ്റ് ചെയ്ത ചിക്കൻ കഷണങ്ങൾ ഇട്ടു തിരിച്ചും മറിച്ചും ഒരു 5 മിനിറ്റ് ഫ്രൈ ചെയ്തു എടുക്കുക. അതിലേക്ക് അരച്ച് വച്ചിരിക്കുന്ന സവാള മിക്സ് ഒഴിച്ച് ഇളക്കി അടച്ചു വച്ച് വേവിക്കുക. ഉപ്പ് നോക്കിയതിന് ശേഷം ആവശ്യം എങ്കിൽ ചേർക്കുക
ഫ്രഷ് ക്രീം ഉണ്ടാക്കുന്നതിനായി ഒരു ബൗളിൽ മൈദാ പാലൊഴിച്ചു കട്ട ഇല്ലാതെ മിക്സ് ചെയ്തെടുക്കുക. ബാക്കി പാൽ പാത്രത്തിൽ ഒഴിച്ച് ചൂടായി വരുമ്പോൾ മൈദാ മിക്സ് ഒഴിച്ച് കട്ട ഇല്ലാതെ ഇളക്കുക. കുറുകി വരുമ്പോൾ അതിൽ ബട്ടറും ഒരു നുള്ള് പഞ്ചസാരയും ചേർത്ത് മിക്സ് ചെയ്യുക. ഇങ്ങനെ ഉണ്ടാക്കിയ ഫ്രഷ് ക്രീം, ഡെക്കറേറ്റ് ചെയ്യാൻ ആയി കുറച്ചു മാറ്റി വച്ച ശേഷം ചിക്കൻ കറിയിൽ ഇട്ടു ഇളക്കി എടുക്കുക. ചെറുതായി അരിഞ്ഞ മല്ലിയില, ഉള്ളം കൈയിൽ വച്ച് ക്രഷ് ചെയ്ത കസൂരി മേത്തി കൂടി ചേർക്കുക. സെർവിങ് ബൗളിലേക്ക് മാറ്റിയ ശേഷം മാറ്റി വച്ച ഫ്രഷ് ക്രീം ഉപയോഗിച്ച് ഡെക്കറേറ്റ് ചെയ്യുക.
വെള്ളയപ്പത്തിന്റെ കൂടെ ക്രിസ്തുമസ് പ്രാതൽ ആയി ക്രീമി ചിക്കൻ കറിയും, ബർമീസ് മുട്ട മസാലയും ഉപയോഗിക്കാം. ഈ കറി ഫ്രഷ് ക്രീം ഇടാതെയും രുചികരമായ ഹെൽത്തി വേർഷൻ ആയി ഉപയോഗിക്കാവുന്നതാണ്.
ജന്മഭൂമി ഓണ്ലൈന്