തിരുവനന്തപുരം: സര്‍ക്കാര്‍ ഹോമില്‍ നിന്ന് ഒളിച്ചോടിയ കുട്ടികളെ പോലീസുകാരനായി ആള്‍മാറാട്ടം നടത്തി തട്ടിക്കൊണ്ടുപോയി പീഡിപ്പിച്ച കേസില്‍ പ്രതി മെഡിക്കല്‍ കോളജ് മടത്തുവിള വീട്ടില്‍ വിഷ്ണു (35)ഏഴ് വര്‍ഷം കഠിന തടവും 65,000 രൂപ പിഴയ്‌ക്കും തിരുവനന്തപുരം പ്രത്യേക അതിവേഗ കോടതി ജഡ്ജി അഞ്ജു മീര ബിര്‍ള ശിക്ഷിച്ചു. പിഴ തുക കുട്ടികള്‍ക്ക് നല്‍കണമെന്നും ലീഗല്‍ സര്‍വീസ് അതോറിറ്റി കുട്ടിക്ക് നഷ്ടപരിഹാരം നല്‍കണമെന്നും വിധിയിലുണ്ട്.
2022 നവംബര്‍ അഞ്ചിന് രാത്രി ഏഴ് മണിയോടെ ഹോമില്‍ നിന്ന് പതിനഞ്ച് വയസുള്ള രണ്ട് പെണ്‍കുട്ടികള്‍ ഒളിച്ചോടി സുഹൃത്തിനെ കാണാന്‍ മെഡിക്കല്‍ കോളജ് ഗ്രൗണ്ടില്‍ എത്തി. അവിടെ വെച്ച് കുട്ടികളെ കണ്ട പ്രതി താന്‍ പോലീസുകാരനെന്ന് പറഞ്ഞ് എന്തിന് ഇവിടെ നില്‍ക്കുന്നു എന്ന് ആരാഞ്ഞു. പ്രതിയെ കണ്ട് ഭയന്നോടിയ കുട്ടികളെ പിന്നാലെ സ്‌കൂട്ടറില്‍ പിന്തുടര്‍ന്ന് ഭീഷണിപ്പെടുത്തി. കേസില്‍ നിന്നും രക്ഷപ്പെടുത്താമെന്ന് പറഞ്ഞ് സ്‌കൂട്ടറില്‍ കയറ്റി അടുത്തുള്ള ലോഡ്ജിലേക്ക് കൊണ്ട് പോയി മുറി എടുത്തതിനുശേഷം ഒരു കുട്ടിയെ പീഡിപ്പിച്ചു. വിവാഹ വാഗ്ദാനം നല്‍കിയ ശേഷം ആണ് പീഡിപ്പിച്ചത്. കൂടെ ഉള്ള കുട്ടി ക്ഷീണിച്ച് കിടന്ന് ഉറങ്ങിയപ്പോഴാണ് പീഡനം നടത്തിയത്. അടുത്ത ദിവസം പുലര്‍ച്ചെ കുട്ടികളെ മെഡിക്കല്‍ കോളജ് ജങ്ഷനില്‍ ഇറക്കി വിട്ട് ഇയാള്‍ മുങ്ങി. ഈ സമയം കുട്ടികളെ കാണാതായത് സംബന്ധിച്ച് ഹോം അധികൃതര്‍ പൂജപ്പുര പോലീസില്‍ പരാതി നല്‍കി.
കുട്ടികള്‍ എവിടെ പോകണം എന്ന് അറിയാതെ മ്യൂസിയത്തിന് സമീപം എത്തിയപ്പോള്‍ പോലീസ് ഇവരെ പിടികൂടി. തുടര്‍ന്ന് മൊഴി എടുത്തപ്പോള്‍ ആണ് പീഡന വിവരം പുറത്ത് വന്നത്. പ്രോസിക്യൂഷനു വേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ അഡ്വ. ആര്‍ .എസ്. വിജയ് മോഹന്‍ ഹാജരായി.
