റബാറ്റ്: ആഫ്രിക്കന് വന്കരയിലെ അന്താരാഷ്ട്ര ഫുട്ബോള് മാമാങ്കം ആഫ്രിക്ക കപ്പ് ഓഫ് നേഷന്സിന് തുടക്കം. ആദ്യ മത്സരത്തില് ആതിഥേയരായ മൊറോക്കോ വിജയിച്ചു. ഗ്രൂപ്പ് എയില് നടന്ന പോരാട്ടത്തില് കൊമോറോസിനെ 2-0നാണ് മൊറോക്ക പരാജയപ്പെടുത്തിയത്.
ഉദ്ഘാടന മത്സരത്തിന്റെ ആദ്യ പകുതി ഗോള് രഹിതമായി പിരിഞ്ഞു. രണ്ടാം പകുതിയിലാണ് രണ്ട് ഗോളുകളും വീണത്. പത്താം മിനിറ്റില് മൊറോക്കോയ്ക്ക് അനുകൂലമായൊരു പെനാല്റ്റി കിട്ടിയെങ്കിലും കിക്കെടുത്ത റാഹിമി അവസരം പാഴാക്കി.
55-ാം മിനിറ്റില് മികച്ചൊരു ഫിനിഷിങ്ങിലൂടെ സ്പാനിഷ് ക്ലബ്ബ് റയല് മാഡ്രിഡിനായി കളിക്കുന്ന മധ്യനിരതാരം ബ്രാഹിം ഡിയാസ് സ്കോര് ചെയ്തു. ആഫ്രിക്ക കപ്പ് ഓഫ് നേഷന്സിലെ ഇത്തവണത്തെ ആദ്യ ഗോള്. 74-ാം മിനിറ്റില് മൊറോക്കോയുടെ രണ്ടാം ഗോള്. പകരക്കാരനായി ഇറങ്ങിയ അയൂബ് എല് കാബി മികച്ചൊരു ബൈസിക്കിള് കിക്കിലൂടെ പന്ത് വലയിലാക്കി. അത്യുഗ്രന് മുന്നേറ്റത്തിനൊടുവില് സലാഹ് എഡ്ഡിന് ഉയര്ത്തിയിട്ട മികച്ചൊരു ക്രോസ് ആണ് അയൂബ് ഗോളിലേക്ക് തിരിച്ചുവിട്ടത്. ഇരുടീമുകളുടെയും പ്രതിരോധ നിര പരുക്കന് കളി പുറത്തെടുത്തത് പലപ്പോഴും മത്സരത്തെ വിരസമായി.
ഇന്ന് വൈകീട്ട് ആറിന് കോംഗോ-ബെനിന് പോരാട്ടം നടക്കും. രാത്രി എട്ടരയ്ക്ക് ആരംഭിക്കുന്ന മത്സരത്തില് സെനഗലും ബോട്ട്സ്വാനയും ഏറ്റുമുട്ടും. രാത്രി 11ന് നൈജീരിയ-ടാന്സാനിയ മത്സരവും അരങ്ങേറും. നാളെയാണ് നിലവിലെ ജേതാക്കളായ ഐവറി കോസ്റ്റ് ഇത്തവണത്തെ ആദ്യ പോരാട്ടത്തിനിറങ്ങുക. ഗ്രൂപ്പ് എഫില് നടക്കുന്ന മത്സരത്തില് മൊസാബിക്യു ആണ് എതിരാളികള്. രണ്ട് വര്ഷം മുമ്പ് ഫൈനലില് നൈജീരിയയെ തോല്പ്പിച്ചാണ് ഐവറി കോസ്റ്റ് ജേതാക്കളായത്.
