തിരുവനന്തപുരം: ചീഫ് പോസ്റ്റ് മാസ്റ്റര്‍ ജനറല്‍ ഓഫീസില്‍ ക്രിസ്മസ് കരോളില്‍ നിന്നു ബിഎംഎസ് പ്രവര്‍ത്തക ആയതിനാല്‍ ക്രിസ്ത്യന്‍ യുവതിയെ സിപിഎം ഒഴിവാക്കി.
ബിഎംഎസ് പ്രവര്‍ത്തകയായ രേഷ്മ മേരി ജോസിനെയാണ് കരോള്‍ ഗ്രൂപ്പില്‍ നിന്ന് ഒഴിവാക്കിയത്. ക്രിസ്മസ് ആഘോഷം റദ്ദാക്കിയതിനു പിന്നിലും സിപിഎമ്മാണ്. രേഷ്മയെ കരോള്‍ പാടിക്കില്ലെന്നും ഇടതു യൂണിയന്റെ ഭീഷണിയുണ്ട്.
പോസ്റ്റല്‍ വകുപ്പില്‍ ക്രിസ്തുമസ് ആഘോഷം നടത്തിയാല്‍ കരോള്‍ ഗാനത്തിനു പകരം ദേശഭക്തിഗാനം പാടുമെന്നു ബിഎംഎസ് ശാഠ്യം പിടിച്ചെന്നും ഇതുമൂലം ആഘോഷം തന്നെ റദ്ദായെന്നുമായിരുന്നു സിപിഎമ്മിന്റെ പ്രചാരണം. എന്നാല്‍ ബിഎംഎസ് നിലപാടെടുത്തത് ക്രിസ്ത്യന്‍ വിശ്വാസിയായ തനിക്കു വേണ്ടിയെന്നു യുവതി വ്യക്തമാക്കി. ഇതോടെ വര്‍ഗീയ വിഷം പ്രചരിപ്പിക്കാനുള്ള സിപിഎം നീക്കം പൊളിഞ്ഞു.
ഇടതു ബന്ധം ഉപേക്ഷിച്ച് ബിഎംഎസ് പ്രവര്‍ത്തക ആയതിനാലാണ് കരോള്‍ ഗ്രൂപ്പില്‍ നിന്ന് ഒഴിവാക്കിയതെന്നാണ് രേഷ്മ മേരി ജോസ് പറയുന്നത്. മേരി ജോസ് കരോള്‍ പാടാനായി തയാറെടുത്തിരുന്നു. എന്നാല്‍ ബിഎംഎസുകാര്‍ കരോള്‍ ഗാനം പാടേണ്ടെന്ന് ഇടതു യൂണിയന്‍ നിലപാടെടുത്തു. ഇതോടെ ബദല്‍ പരിപാടിയെന്ന നിലപാടുമായി ഭാരതീയ പോസ്റ്റല്‍ അഡ്മിനിസ്‌ട്രേറ്റീവ് ഓഫീസസ് എംപ്ലോയീസ് യൂണിയന്‍ രംഗത്തെത്തി. വിലക്കേര്‍പ്പെടുത്തിയാല്‍ കരോള്‍ ഗാനത്തിനൊപ്പം സിപിഎമ്മിന് ഇഷ്ടമില്ലാത്ത ദേശഭക്തിഗാനങ്ങളും പാടുമെന്നും ബിഎംഎസ് നിലപാടെടുത്തു.
ഇതോടെ ഇടതു സംഘടനാ നേതാക്കളുടെ സമ്മര്‍ദ്ദത്തെതുടര്‍ന്ന് അധികൃതര്‍ ക്രിസ്തുമസ് പരിപാടി റദ്ദാക്കി. എന്നാല്‍ വര്‍ഗീയത കുത്തിയിളക്കാനായി മന്ത്രി വി. ശിവന്‍കുട്ടിയടക്കമുള്ള സിപിഎം നേതാക്കള്‍ രംഗത്തെത്തിയിട്ടുണ്ട.്
ക്രിസ്മസ് ആഘോഷ പരിപാടി റദ്ദാക്കിയതിനു പിന്നില്‍ ബിഎംഎസ് ആണെന്നാരോപിച്ച് തിങ്കളാഴ്ച നടക്കുന്ന പ്രതിഷേധ യോഗത്തില്‍ വി.ശിവന്‍കുട്ടി പങ്കെടുക്കുന്നുമുണ്ട്. ഇതിനിടയിലാണ് രേഷ്മ മേരി ജോസിന്റെ ശബ്ദരേഖ പുറത്തുവന്നത്.
