മസ്ക്കറ്റ്: ഒമാനും ഭാരതവും കാര്ഷിക, ഉന്നത വിദ്യാഭ്യാസ മേഖലകളിലും പരസ്പരം സഹകരിക്കും. അദ്ധ്യാപകരുടെയും ഗവേഷകരുടെയും പണ്ഡിതന്മാരുടെയും സേവനം പരസ്പരം ലഭ്യമാക്കും. വിജഞാനത്തിന്റെ പുതിയ മേഖലകള് പരസ്പരം തുറക്കും.
പരസ്പരം മാരിറ്റൈം മ്യൂസിയങ്ങളെ പ്രോത്സാഹിപ്പിക്കും. ഭാരതത്തിലെ ലോത്തലിലുള്ള ദേശീയ മാരിറ്റൈം ഹെറിറ്റേജ് കോംപ്ലക്സിനെ ഒമാന് പിന്തുണയ്ക്കും. പുരാവസ്തുക്കളും കലാവസ്തുക്കളും അവയുമായി ബന്ധപ്പെട്ട വൈദഗ്ധ്യവും കൈമാറും.
റുധാന്യങ്ങളുടെയും ഭക്ഷ്യവസ്തുക്കളുടെയും കൃഷി, ഗവേഷണം, പ്രോത്സാഹനം തുടങ്ങിയ കാര്യങ്ങളില് ഭാരതം ഒമാനെ സഹായിക്കും. ഒമാന്റെ കാലാവസ്ഥയ്ക്ക് അനുയോജ്യമായ രീതിയില് ചെറുധാന്യങ്ങളുടെ കൃഷിക്ക് സഹായം നല്കും. സമുദ്രോത്പന്നങ്ങള്, സമുദ്ര സുരക്ഷ എന്നീ കാര്യങ്ങളിലും സഹകരണം ശക്തമാക്കും.
സുഖമാണോ? മലയാളത്തില് മോദിയുടെ ചോദ്യം
മസ്ക്കറ്റ്: സുഖമാണോ? ഭാരതീയര് തിങ്ങിനിറഞ്ഞ ഹാളില് പ്രധാനമന്ത്രി നരേന്ദ്ര മോദി സുന്ദരമായ മലയാളത്തില് ചോദിച്ചപ്പോള് ഹാള് ഹര്ഷാരവത്താല് മുഖരിതമായി. ഒമാന് സന്ദര്ശനത്തിനിടെ ഭാരതീയരെ അഭിസംബോധന ചെയ്യുകയായിരുന്നു അദ്ദേഹം. മലയാളികള് ലോകത്ത് എവിടെയും ചെന്നെത്തിയിട്ടുണ്ടെന്ന് മോദി പറഞ്ഞു.
കാലമേറെയായ ബന്ധം – മോദി
മാണ്ഡ്വി മുതല് മസ്കറ്റ് വരെ നീളുന്ന, ഭാരതവും ഒമാനും തമ്മിലുള്ള ബന്ധം കാലപ്പഴക്കമേറിയ ഒന്നാണെന്ന് പ്രധാനമന്ത്രി നരേന്ദ്ര മോദി. ഭാരതീയരുടെ സമ്മേളനത്തെ അഭിസംബോധന ചെയ്യുകയായിരുന്നു അദ്ദേഹം. വൈവിധ്യമാണ് ഭാരത സംസ്കാരത്തിന്റെ അടിത്തറ, അതിനാല് അവര് ഏതൊരു സമൂഹത്തിലും ഇഴുകിച്ചേരും. ഒമാനില് ഭാരത സമൂഹത്തെ എത്രമാത്രം നന്നായി പരിഗണിക്കുന്നുവെന്ന് ചൂണ്ടിക്കാട്ടിയ പ്രധാനമന്ത്രി, സഹവര്ത്തിത്വവും സഹകരണവും പ്രവാസികളുടെ മുഖമുദ്രയാണെന്ന് അടിവരയിട്ടു.
