കൊച്ചി: വിമാനത്താവളത്തില് എത്തിയ ശേഷം കാണാതായ സൂരജ് ലാമയെ കുവൈറ്റില് നിന്ന് നാടുകടത്തിയതുമായി ബന്ധപ്പെട്ട് കേന്ദ്ര സര്ക്കാര്, കേന്ദ്ര രഹസ്യാന്വേഷണ ഏജന്സികളില് നിന്നു ലഭിച്ച വിശദാംശങ്ങള് വ്യാഴാഴ്ചയ്ക്കകം സമര്പ്പിക്കാന് കൊച്ചി അന്താരാഷ്ട്ര വിമാനത്താവള അധികൃതരോട് (സിയാല്) ഹൈക്കോടതി നിര്ദേശിച്ചു.
ലാമയെ നാടുകടത്തിയതുമായി ബന്ധപ്പെട്ട് കേന്ദ്ര അധികാരികളില് നിന്ന് സിയാലിന് ഒരു വിവരവും ലഭിച്ചില്ലെങ്കില്, ബന്ധപ്പെട്ട അധികാരികള്ക്കെതിരെ ആവശ്യമായ നടപടികള് സ്വീകരിക്കുമെന്ന് കോടതി പറഞ്ഞു. കാണാതായ വ്യക്തിയുടെ മകന് സാന്റണ് ലാമ തന്റെ അച്ഛനെ കണ്ടെത്തണമെന്ന് ആവശ്യപ്പെട്ട് സമര്പ്പിച്ച ഹേബിയസ് കോര്പസ് ഹര്ജി ജസ്റ്റിസുമാരായ ദേവന് രാമചന്ദ്രനും എം.ബി. സ്നേഹലതയും അടങ്ങുന്ന ബെഞ്ച് പരിഗണിക്കുകയായിരുന്നു.
ലാമ വര്ഷങ്ങളായി കുവൈറ്റില് ജോലി ചെയ്തിരുന്നു, വിഷമദ്യം കഴിച്ചതിനെത്തുടര്ന്ന് അക്യൂട്ട് ടോക്സിക് ല്യൂക്കോഎന്സെഫലോപ്പതി ബാധിച്ച് അവിടെ ആശുപത്രിയില് പ്രവേശിപ്പിച്ചിരിക്കുകയായിരുന്നു.
ഓര്മക്കുറവും ആശയക്കുഴപ്പവും അദ്ദേഹത്തെ അലട്ടിയിരുന്നതായി റിപ്പോര്ട്ടുണ്ട്. ഒക്ടോ. 5 ന് കൊച്ചിയിലേക്ക് നാടുകടത്തിയ ശേഷം, നഗരത്തിലും പരിസര പ്രദേശങ്ങളിലും അദ്ദേഹത്തെ കണ്ടതായി റിപ്പോര്ട്ടുണ്ട്. 8 ന് തൃക്കാക്കര പോലീസ് അദ്ദേഹത്തെ കസ്റ്റഡിയിലെടുക്കുകയും പിന്നീട് കളമശേരിയിലെ ഗവ. മെഡിക്കല് കോളജ് ആശുപത്രിയില് പ്രവേശിപ്പിക്കുകയും ചെയ്തു. അതിനുശേഷം, അദ്ദേഹം എവിടെയെന്ന കാര്യം അജ്ഞാതമായി തുടരുന്നതിനാല് മകന് ഹൈക്കോടതിയെ സമീപിക്കുകയായിരുന്നു. സിയാല് പ്രസ്താവനയും വാദങ്ങളും സമര്പ്പിക്കുന്നതിനായി ഹര്ജി വ്യാഴാഴ്ചത്തേക്ക് മാറ്റി.
