പത്തനംതിട്ട: ഇടത് സര്ക്കാര് 2016ല് അധികാരമേറ്റ് അധികം വൈകാതെ തന്നെ ശബരിമല ശ്രീകോവിലില് പൊതിഞ്ഞ സ്വര്ണം കൊള്ളയടിക്കാന് നടത്തിയ നീക്കങ്ങളുടെ നാള്വഴി തേടി എസ്ഐടി. സ്വര്ണക്കൊള്ളയില് ഉന്നതരുടെ പങ്ക് കണ്ടെത്താനുള്ള ശ്രമത്തിന്റെ ഭാഗമായാണിത്.
ശബരിമല ശ്രീകോവില് സ്വര്ണം പൊതിഞ്ഞ വിജയ് മല്യ 9000 കോടിയുടെ വായ്പാ വെട്ടിപ്പിന്റെ പേരില് രാജ്യം വിട്ടത് 2016 മാര്ച്ച് രണ്ടിന്. പിണറായി സര്ക്കാര് ആദ്യം അധികാരത്തില് എത്തുന്നതിന് മാസങ്ങള്ക്ക് മുമ്പായിരുന്നു ഇത്. വഴിപാടുകാരന് തിരികെ വരാനുള്ള സാധ്യത കുറവാണെന്ന ബോധ്യത്തോടെയാണ് സ്വര്ണക്കൊള്ളയ്ക്ക് കളമൊരുക്കിയതെന്ന് എസ്ഐടി സംശയിക്കുന്നു.
അച്യുതാനന്ദന് സര്ക്കാര് ഭരിച്ച 2010-11 കാലത്ത് ശബരിമല സ്പെഷല് കമ്മിഷണറായിരുന്ന എന്. വാസുവിനെ പിണറായി സര്ക്കാര് 2018ല് അതേ സ്ഥാനത്ത് വീണ്ടും നിയോഗിച്ചതാണ് സംശയം ജനിപ്പിക്കുന്ന മറ്റൊരു വസ്തുത. ഒരിക്കല് കമ്മിഷണര് പദവിയില് ഇരുന്ന വ്യക്തിയെ നീണ്ട ഇടവേളയ്ക്ക് ശേഷം വീണ്ടും ആ സ്ഥാനത്ത് എന്തിനു നിയമിച്ചു എന്നാണ് ഉയരുന്ന ചോദ്യം.
ദ്വാരപാലക പാളികളുടെ നിറം മങ്ങിയതിനെ തുടര്ന്ന് സ്വര്ണം പൂശാനായി തയാറാക്കിയ നോട്ടില് ശ്രീകോവിലിന്റെ മേല്ക്കൂര ചോര്ന്നൊലിക്കുന്ന വിവരം കൂടി ചേര്ത്തത് അവിടെയുള്ള ഭീമമായ സ്വര്ണം ലക്ഷ്യമിട്ടായിരുന്നോ എന്ന സംശയവും ഉയരുന്നു. ഇത് പ്രാവര്ത്തികമാക്കാനാണൊ പ്രശാന്തിന്റെ കാലാവധി ഒരു തവണകൂടി നീട്ടാന് സര്ക്കാര് തലത്തില് നീക്കം നടന്നതെന്ന കാര്യവും സംശയകരമാണ്.
സര്ക്കാര് സമ്മര്ദ്ദത്തെ തുടര്ന്നാണ് പാളികള് കടത്തിയതെന്നുള്ള എ. പത്മകുമാറിന്റെ മൊഴിയെ തുടര്ന്നാണ് ബോര്ഡ് നിയമനങ്ങളും സാഹചര്യങ്ങളും കണ്ടെത്തി അന്വേഷണ സംഘം നാള്വഴി തയാറാക്കിയത്.
ജന്മഭൂമി ഓണ്ലൈന്