കാസര്‍കോട് :പ്രായപൂര്‍ത്തിയാകാത്ത സഹോദരന് സ്‌കൂട്ടര്‍ ഓടിക്കാന്‍ നല്‍കിയെന്ന് പറഞ്ഞ് പൊലീസെടുത്തത് കളളക്കേസാണെന്ന് തെളിയിച്ച് പത്തൊന്‍പതുകാരി. മേനങ്കോട് സ്വദേശിനി മാജിദയാണ് കളളക്കേസെടുത്ത വിദ്യാനഗര്‍ എസ്‌ഐക്കെതിരെ ജില്ലാ പൊലീസ് മേധാവിക്ക് പരാതി നല്‍കിയത്. കഴിഞ്ഞ ഞായറാഴ്ച വൈകിട്ട് ചെര്‍ക്കളബേര്‍ക്ക റോഡിലാണ് സംഭവം.
ഇളയ സഹോദരനെ സ്‌കൂട്ടറിലിരുത്തി യുവതി കടയില്‍ കയറി. ഈ സമയത്ത് അവിടെ എത്തിയ പൊലീസ് സ്‌കൂട്ടറില്‍ ഇരിക്കുന്ന വിദ്യാര്‍ഥിയാണ് ഓടിച്ചതെന്ന ധാരണയില്‍ സ്‌കൂട്ടര്‍ കസ്റ്റഡിയിലെടുത്ത് സ്റ്റേഷനിലേക്ക് മാറ്റി. താനല്ല ഓടിച്ചതെന്ന് വിദ്യാര്‍ഥി പറഞ്ഞിട്ടും കേള്‍ക്കാന്‍ പൊലീസ് തയാറായില്ലെന്ന് മാജിദ പറഞ്ഞു. പ്രായപൂര്‍ത്തിയാകാത്ത സഹോദരന് സ്‌കൂട്ടര്‍ ഓടിച്ചെന്ന പേരില്‍ ഉടമയായ മാജിദയ്‌ക്കെതിരെ കേസെടുത്തു.തുടര്‍ന്നാണ് സിസിടിവി ദൃശ്യത്തിന്റെ സഹായത്തോടെ പൊലീസ് കള്ളക്കേസെടുത്തെന്ന് മാജിദ തെളിയിച്ചത്. സഹോദരനൊപ്പം യാത്ര ചെയ്തപ്പോള്‍ മാജിദയാണ് സ്‌കൂട്ടര്‍ ഓടിച്ചതെന്ന് സിസിടിവി ദൃശ്യത്തില്‍ വ്യക്തമാണ്.
സ്‌കൂട്ടര്‍ നിര്‍ത്തി മാജിദയും സഹോദരനും നടന്നു പോകുന്നത് ദൃശ്യത്തിലുണ്ട്. സഹോദരന് തിരിച്ചുവന്ന് സ്‌കൂട്ടറിനു സമീപം നില്‍ക്കുമ്പോഴാണ് പൊലീസ് വാഹനം എത്തിയത്. വിദ്യാര്‍ഥിയെ പൊലീസ് ചോദ്യം ചെയ്യുന്നതും കാണാം. തുടര്‍ന്ന് സ്‌കൂട്ടര്‍ പിടിച്ചെടുത്തു. സിസിടിവി ദൃശ്യങ്ങളടക്കം ഹാജരാക്കിയിട്ടും എഫ്‌ഐആര്‍ റദ്ദാക്കുകയോ വാഹനം വിട്ടുനല്‍കുകയോ ചെയ്തില്ലെന്ന് മാജിദ ആരോപിച്ചു.ജില്ലാ പൊലീസ് മേധാവിക്ക് പരാതി നല്‍കിയ ശേഷം കഴിഞ്ഞ ദിവസമാണ് വാഹനം വിട്ടു നല്‍കിയത്.അതേ സമയം, വിദ്യാര്‍ഥി വാഹനം ഓടിച്ചെന്ന വകുപ്പ് ഒഴിവാക്കുമെന്നും വാഹനത്തിന് ഇന്‍ഷ്വറന്‍സ് ഇല്ലാത്തതിന് കേസുണ്ടാകുമെന്നും വിദ്യാനഗര്‍ പൊലീസ് വ്യക്തമാക്കി.
