ന്യൂദല്‍ഹി: ഇന്ത്യയുടെ ഊര്‍ജ്ജാവശ്യങ്ങള്‍ക്കായി ഏറ്റവും വലിയ ആണവോര്‍ജ്ജ പ്ലാന്‍റ് സ്ഥാപിക്കാന്‍ റഷ്യ സഹായിക്കുമെന്ന വന്‍പ്രഖ്യാപനവുമായി പുടിന്‍. മോദിയുമായി ചേര്‍ന്ന് നടത്തിയ സംയുക്ത വാര്‍ത്താസമ്മേളനത്തിലാണ് പുടിന്‍ ഇക്കാര്യം വെളിപ്പെടുത്തിയത്.
ഈ ലക്ഷ്യം സാക്ഷാല്‍ക്കരിക്കുക തമിഴ്നാട്ടിലെ കൂടങ്കുളം ആണവോര്‍ജ്ജപ്ലാന്‍റിലൂടെയാണ്. കൂടങ്കുളം ആണവോര്‍ജ്ജ പ്ലാന്‍റിനെ പൂര്‍ണ്ണമായി പ്രവര്‍ത്തനക്ഷമമാക്കി ഇന്ത്യയുടെ ഏറ്റവും വലിയ ആണവോര്‍ജ്ജ പ്ലാന്‍റാിക്ക് മാറ്റുമെന്ന് പുടിന്‍.
തമിഴ്നാട്ടിലെ കൂടങ്കുളത്തുള്ള ഈ ആണവോര്‍ജ്ജ പ്ലാന്‍റില്‍ ആറ് റിയാക്ടറുകളില്‍ രണ്ടെണ്ണം മാത്രമാണ് ഇപ്പോള്‍ പ്രവര്‍ത്തിക്കുന്നത്. ബാക്കിയുള്ള നാലെണ്ണം കൂടി പ്രവര്‍ത്തനക്ഷമമാക്കി ഈ പ്ലാന്‍റിന്റെ ഇന്ത്യയിലെ ഏറ്റവും വലിയ ആണവോര്‍ജ്ജ പ്ലാന്‍റാക്കി മാറ്റാന്‍ സഹായിക്കുമെന്ന് പുടിന്‍ വാഗ്ദാനം നല‍്കി.
“ഞങ്ങള്‍ കൂടങ്കുളം ആണവോര്‍ജ്ജ പ്ലാന്‍റുമായി ബന്ധപ്പെട്ട് പദ്ധതി തയ്യാറാക്കിവരികയാണ്. ഇവിടെ ആറെണ്ണത്തില്‍ രണ്ട് റിയാക്ടറുകള്‍ ഇപ്പോള്‍ ഊര്‍ജ്ജശൃംഖലയുമായി ബന്ധപ്പെടുത്തിയിട്ടുണ്ട്. ബാക്കി നാല് റിയാക്ടറുകളുടെ പണി നടന്നുവരികയാണ്. ബാക്കി നാല് റിയാക്ടറുകള്‍ പൂര്‍ണ്ണമായും പ്രവര്‍ത്തനക്ഷമമാക്കുന്നതോടെ ഇന്ത്യയുടെ ഊര്‍ജ്ജാവശ്യങ്ങള്‍ക്ക് മികച്ച സംഭാവന നല്‍കുന്ന പ്ലാന്‍റായി കൂടങ്കുളം മാറും.”- പുടിന്‍ പറഞ്ഞു.
കൂടങ്കുളത്തിലെ മൂന്നാം റിയാക്ടറിന് ആവശ്യമായ ഇന്ധനം ഉടന്‍ റഷ്യ അയയ്‌ക്കും
പുടിന്റെ ഈ പ്രഖ്യാപനത്തിന് പിന്നാലെ റഷ്യയുടെ പൊതുമേഖല ന്യൂക്ലിയര്‍ കോര്‍പറേഷന്‍ റൊസാട്ടം ഇന്ത്യയുടെ കൂടങ്കുളത്തിലെ മൂന്നാമത്തെ റിയാക്ടര്‍ പ്രവര്‍ത്തിപ്പിക്കുന്നതിന് ആവശ്യമായ ഇന്ധനം അയയ്‌ക്കുമെന്ന് പ്രഖ്യാപിച്ചു.
