കൊല്ലം:നിര്മ്മാണം നടക്കുന്ന ദേശീയപാതയുടെ സംരക്ഷണ ഭിത്തി ഇടിഞ്ഞുതാണത് വിവാദമായി. സര്വീസ് റോഡിലേക്കാണ് ഇടിഞ്ഞുവീണത്.ദേശീയപാതയോട് ചേര്ന്ന സര്വീസ് റോഡും ഇടിഞ്ഞു താണിട്ടുണ്ട്. കൊട്ടിയം മൈലക്കാടിന് സമീപമാണ് സംഭവം. സ്കൂള് ബസ് ഉള്പ്പടെയുള്ള വാഹനങ്ങള് റോഡില് കുടുങ്ങി.കുട്ടികളടക്കമുണ്ടായിരുന്ന വാഹനത്തില് നിന്ന് എല്ലാവരെയും പുറത്തെത്തിച്ചു. ആര്ക്കും ഗുരുതര പരിക്കുകള് ഇല്ല.
സ്ഥലത്ത് ഗതാഗത കുരുക്ക് തുടരുകയാണ്. 500 മീറ്റര് ദൂരത്തിലാണ് സംരക്ഷണ ഭിത്തി ഇടിഞ്ഞുതാണത്.വയലുകളാല് ചുറ്റപ്പെട്ട പ്രദേശമാണിത്.റോഡ് ഉയരത്തില് നിര്മിക്കുന്നതിന്റെ ഭാഗമായി മണ്ണിട്ട് ഉയര്ത്തിയ ഭാഗമാണ് ഇടിഞ്ഞു താഴ്ന്നത്. ശാസ്ത്രീയ പഠനങ്ങള് നടത്തിയാണ് നിര്മാണം ആരംഭിച്ചതെന്നാണ് കമ്പനി പറയുന്നതെങ്കിലും ഇത്തരത്തിലുള്ള വലിയ അപകടം എങ്ങിനെ ഉണ്ടായി എന്ന ആശങ്കയിലാണ് ജനങ്ങള്.
ശിവാലയ കണ്സ്ക്ട്രക്ഷന്സിനാണ് ദേശീയപാതയുടെ നിര്മാണ ചുമതലയുള്ളത്. കടമ്പാട്ടുകോണം – കൊല്ലം സ്ട്രെച്ചിലാണ് അപകടം ഉണ്ടായത്.
അതേസമയം, സംഭവം അടിയന്തരമായി അന്വേഷിക്കാന് പൊതുമരാമത്ത് സെക്രട്ടറിക്ക് മന്ത്രി മുഹമ്മദ് റിയാസ് നിര്ദേശം നല്കി .നിര്മാണത്തില് അപാകതയുണ്ടോ എന്ന് പരിശോധിക്കുമെന്ന് ദേശീയപാത അതോറിറ്റി അറിയിച്ചു. ദേശീയപാത പ്രോജക്ട് ഡയറക്ടറും സൈറ്റ് എഞ്ചിനീയര്മാരും സ്ഥലത്ത് എത്തി.
