പത്തനംതിട്ട: ശബരിമല സ്വര്‍ണക്കൊള്ള കേസില്‍ അന്വേഷണം നടത്താന്‍ ഹൈക്കോടതി ഇ ഡിയെ അനുവദിച്ചതിനാല്‍ നടപടികള്‍ വേഗത്തിലാക്കാന്‍ എസ്‌ഐടി നീക്കം. കൂടുതല്‍ അറസ്റ്റ് ഉടന്‍ ഉണ്ടാകുമെന്നാണ് സൂചന.
സര്‍ക്കാരില്‍ നിന്നും ഉണ്ടായ സമ്മര്‍ദ്ദത്തെ തുടര്‍ന്നാണ് പാളികള്‍ ഉണ്ണികൃഷ്ണന്‍ പോറ്റി വശം ചെന്നൈയ്‌ക്ക് കൊടുത്തുവിട്ടതെന്ന പത്മകുമാറിന്റെ മൊഴിയില്‍ വ്യക്തത വരുത്താന്‍ അന്നത്തെ ദേവസ്വം മന്ത്രി കടകംപള്ളി സുരേന്ദ്രനെ വൈകാതെ ചോദ്യം ചെയ്യുമെന്ന് അറിയുന്നു. കട്ടിളപ്പാളികള്‍ സ്വര്‍ണം പൂശാനായി സ്‌പോണ്‍സര്‍ ചെയ്യാന്‍ തന്നെ അനുവദിക്കണമെന്ന്കാട്ടി ഉണ്ണികൃഷ്ണന്‍ പോറ്റി ദേവസ്വം മന്ത്രിക്ക് അപേക്ഷ സമര്‍പ്പിച്ചിരുന്നതായും പത്മകുമാര്‍ മൊഴി നല്‍കിയിരുന്നു. എന്നാല്‍ കടകംപള്ളിയെ ഉടന്‍ ചോദ്യം ചെയ്താല്‍ അത് തെരഞ്ഞെടുപ്പിനെ ബാധിക്കുമെന്നതിനാല്‍ അടുത്ത ആഴ്ചയോടെയേ ചോദ്യംചെയ്യല്‍ ഉണ്ടാവൂ.
സ്വര്‍ണക്കൊള്ള സംബന്ധിച്ച് ക്രൈംബ്രാഞ്ച് രണ്ട് കേസുകളാണ് നേരത്തെ രജിസ്റ്റര്‍ ചെയ്തിരുന്നത്. ഇതില്‍ കട്ടിളപ്പാളി കേസില്‍ മാത്രമാണ് 2019-ലെ ദേവസ്വം ബോര്‍ഡ് ഭരണ സമിതിയെ പ്രതിചേര്‍ത്തിരുന്നത്. എന്നാല്‍ ദേവസ്വം കമ്മിഷണര്‍ ‘പിത്തള പാളികള്‍’ ഉണ്ണികൃഷ്ണന്‍ പോറ്റി വശം ചെന്നൈയ്‌ക്ക് കൊടുത്തു വിടണമെന്നു കാട്ടി ദേവസ്വം ബോര്‍ഡിന് സമര്‍പ്പിച്ച ശിപാര്‍ശ കത്തിലും മിനിറ്റ്‌സിലും പത്മകുമാര്‍ ചെമ്പുപാളി എന്ന് സ്വന്തം കൈപ്പടയില്‍ തിരുത്തിയതു കണ്ടെത്തിയതിനെത്തുടര്‍ന്നാണ് ദ്വാരപാലക ശില്‍പപാളി കേസിലും പത്മകുമാറിനെ പ്രതിചേര്‍ത്തത്. ഈ കേസില്‍ പത്മകുമാറിനെ കൂടാതെ അന്നത്തെ ദേവസ്വം അംഗങ്ങളായ ശങ്കരദാസിനും വിജയകുമാറിനും തുല്യപങ്കാളിത്തമുണ്ടെന്ന് വ്യക്തമായിരിക്കെ, അവരെ ഇനിയും വിശദമായി ചോദ്യം ചെയ്യാന്‍ എസ്‌ഐടി തയാറായിട്ടില്ല. പത്മകുമാര്‍ സ്വന്തം ഇഷ്ടപ്രകാരമാണ് തീരുമാനം എടുത്തതെങ്കില്‍ അതിനെ എന്തുകൊണ്ട് മറ്റ് അംഗങ്ങള്‍ എതിര്‍ത്തില്ല എന്ന ചോദ്യവും പ്രസക്തമാണ്. രണ്ട് അംഗങ്ങള്‍ എതിര്‍ത്തിരുന്നെങ്കില്‍ ഉത്തരവിന് സാധുത ഉണ്ടാവില്ലായിരുന്നു.
