ന്യൂദല്‍ഹി: വന്ദേമാതരത്തിന്റെ 150-ാം വര്‍ഷവും എസ്ഐആറും ലോക്സഭ ചര്‍ച്ച ചെയ്യും. ഇന്നലെ സ്പീക്കര്‍ ഓം ബിര്‍ള വിളിച്ചുചേര്‍ത്ത പാര്‍ട്ടി നേതാക്കളുടെ യോഗത്തിലാണ് തിരുമാനം. ഡിസംബര്‍ എട്ടിനാണ് വന്ദേമാതരത്തിന്റെ 150 വര്‍ഷങ്ങള്‍ എന്ന വിഷയത്തില്‍ ചര്‍ച്ച. പ്രധാനമന്ത്രി നരേന്ദ്ര മോദി തുടക്കം കുറിക്കും. എസ്ഐആറിലെ ഒമ്പതിന് ഉച്ചയ്‌ക്ക് 12ന്. രണ്ട് ചര്‍ച്ചകള്‍ക്കും 10 മണിക്കൂര്‍ വീതമാണ് അനുവദിച്ചിരിക്കുന്നത്. എല്ലാ അംഗങ്ങളും ചര്‍ച്ചയുടെ ഭാഗമാകണമെന്നും കേന്ദ്രപാര്‍ലമെന്ററി കാര്യമന്ത്രി കിരണ്‍ റിജിജു ആവശ്യപ്പെട്ടു.
എസ്ഐആറിനെക്കുറിച്ചുള്ള ചര്‍ച്ചയ്‌ക്ക് കേന്ദ്രം സന്നദ്ധമാണെന്ന് കിരണ്‍ റിജിജു തിങ്കളാഴ്ച തന്നെ വ്യക്തമാക്കിയിരുന്നു. എന്നാല്‍ സമയത്തിന്റെ കാര്യത്തില്‍ വാശിപിടിക്കാതെ സഭാനടപടികളുമായി സഹകരിക്കണമെന്നും അദ്ദേഹം പ്രതിപക്ഷത്തോട് ആവശ്യപ്പെട്ടിരുന്നു. എന്നാല്‍ ഇത് കേള്‍ക്കാതെ പ്രതിപക്ഷം ബഹളംവെച്ച് സഭാനടപടികള്‍ തടസപ്പെടുത്തുകയായിരുന്നു. ഇന്നലെയും പ്രതിപക്ഷം ബഹളം തുടര്‍ന്നതോടെയാണ് സ്പീക്കര്‍ ഓം ബിര്‍ള യോഗം വിളിച്ചത്. സര്‍വകക്ഷി യോഗത്തിനുശേഷം ബിസിനസ് ഉപദേശകസമിതി യോഗവും ചേര്‍ന്നു.
രാജ്യസഭയിലും എസ്ഐആറിനെക്കുറിച്ചുള്ള ചര്‍ച്ച ആവശ്യപ്പെട്ട് ഇന്നലെ പ്രതിപക്ഷം ബഹളം തുടര്‍ന്നു. ചര്‍ച്ചയ്‌ക്ക് തയാറാണെന്ന് കിരണ്‍ റിജിജു അറിയിച്ചിട്ടും പ്രതിപക്ഷം ബഹളം തുടരുകയായിരുന്നു. തുടര്‍ന്ന് പ്രതിപക്ഷം സഭ ബഹിഷ്‌കരിച്ച് ഇറങ്ങിപ്പോയി. മണിപ്പൂര്‍ ചരക്ക് സേവന നികുതി (രണ്ടാം ഭേദഗതി) ബില്‍ രാജ്യസഭ പരിഗണിച്ചു. തിങ്കളാഴ്ച ബില്‍ ലോക്സഭ പാസാക്കിയിരുന്നു. ഇരുസഭകളും ഇന്ന് രാവിലെ 11 വരെ പിരിഞ്ഞു. ഇന്ന് സഭയില്‍ സ്വീകരിക്കേണ്ട നിലപാടുകളെകുറിച്ച് ചര്‍ച്ച ചെയ്യാന്‍ ഇന്‍ഡി സഖ്യം നേതാക്കള്‍ രാവിലെ യോഗം ചേരുമെന്ന് അറിയിച്ചിട്ടുണ്ട്.
