ന്യൂദല്‍ഹി:: അഞ്ചാംതലമുറയില്‍പ്പെട്ട റഷ്യയുടെ സ്റ്റെല്‍ത് ജെറ്റായ സുഖോയ് എസ് യു 57ന്റെ ഉന്നത സാങ്കേതിക വിദ്യ കൈമാറുന്നതിനെക്കുറിച്ചും ഇന്ത്യയില്‍ തന്നെ ഈ യുദ്ധവിമാനം നിര്‍മ്മിക്കുന്നതിനെക്കുറിച്ചും റഷ്യന്‍ പ്രസിഡന്‍റ് പുടിന്റെ വ്യാഴാഴ്ചത്തെ ഇന്ത്യാ സന്ദര്‍ശനത്തില്‍ ചര്‍ച്ച ചെയ്യുമെന്ന് പുടിന്റെ പ്രസ് സെക്രട്ടറി ദിമിത്രി പെസ്കോവ്. ഡിസംബര്‍ നാല് വ്യാഴാഴ്ച പുടിന്‍ ഇന്ത്യ സന്ദര്‍ശിക്കുന്നതിന് മുന്നോടിയായി നടത്തിയ വാര്‍ത്താസമ്മേളനത്തിലാണ് പെസ്കോവ് ഇക്കാര്യം പറഞ്ഞത്.
ഇന്ത്യയുമായി പ്രതിരോധരംഗത്ത് ഒട്ടേറെ സംയുക്ത പദ്ധതികള്‍ റഷ്യ നടപ്പാക്കിയിട്ടുണ്ടെന്നും സുപ്രസിദ്ധമായ ബ്രഹ്മോസ് ഇതിന് ഒരു ഉദാഹരണമാണെന്നും പെസ്കോവ് പറഞ്ഞു. ഓപ്പറേഷന്‍ സിന്ദൂര്‍ കാലത്ത് പാകിസ്ഥാന്റെ മിസൈലുകളെ അടിച്ചിട്ട റഷ്യയുടെ സുപ്രസിദ്ധ വ്യോമപ്രതിരോധസംവിധാനമായ എസ് 400 കൂടുതല്‍ എണ്ണം ഇന്ത്യയ്ക്ക് നല്‍കുന്നതിനെക്കുറിച്ചും ചര്‍ച്ച നടക്കുമെന്ന് പെസ്കോവ് പറഞ്ഞു. ഇപ്പോള്‍ മൂന്ന് എസ് 400 ആണ് ഇന്ത്യയ്ക്ക് റഷ്യ നല്‍കിയിരിക്കുന്നത്. പിന്നീട് ഇന്ത്യ ഇതിനെ സുദര്‍ശന്‍ ചക്ര എന്ന് പേരിട്ടു. കൂടുതല്‍ എസ് 400 ഇന്ത്യയ്ക്ക് നല്‍കുന്നത് പുടിന്റെ ഇന്ത്യാസന്ദര്‍ശനത്തില്‍ ചര്‍ച്ച ചെയ്യും.
നേരത്തെ ഇന്ത്യ അഞ്ച് എസ് 400 ഓര്‍ഡര്‍ ചെയ്തെങ്കിലും മൂന്നെണ്ണമാണ് അന്ന് റഷ്യയ്‌ക്ക് നല്കാന്‍ കഴിഞ്ഞുള്ളൂ. അതിനിടയിലാണ് റഷ്യ-ഉക്രൈന്‍ യുദ്ധം പൊട്ടിപ്പുറപ്പെട്ടത്. ഓപ്പറേഷന്‍ സിന്ദൂറില്‍ പാകിസ്ഥാന്‍ മിസൈല്‍ ആക്രമണങ്ങളെ ഫലപ്രദമായി തടയാന്‍ സുദര്‍ശന്‍ ചക്രയ്‌ക്ക് ആയി. ഇപ്പോള്‍ പുടിന്റെ ഇന്ത്യാസന്ദര്‍ശനത്തില്‍ എസ് 400 ഇന്ത്യയ്ക്ക് നല്‍കുന്നത് സംബന്ധിച്ചും ചര്‍ച്ചകള്‍ നടക്കുമെന്നറിയുന്നു.
എസ് യു 57 എന്ന അഞ്ചാം തലമുറ യുദ്ധവിമാനം ഇന്ത്യയില്‍ നിര്‍മ്മിക്കുന്നതും ആലോചനയില്‍
ലോകത്തിലെ ഏറ്റവും മികച്ച യുദ്ധവിമാനമാണ് എസ് യു 57. അഞ്ചാംതലമുറയില്‍ പെട്ട യുദ്ധവിമാനം. ഇത് വെറും കൊടുക്കല്‍ വാങ്ങലോ ആയിരിക്കില്ലെന്നും ഉന്നത സാങ്കേതിക വിദ്യയുടെ കൈമാറ്റമാണ് ഇവിടെ നടക്കുകയെന്നും പുടിന്റെ പ്രസ് സെക്രട്ടറി പെസ്കോവ് പറഞ്ഞു.
