തിരുവനന്തപുരം: സുപ്രീംകോടതിയിലും പാര്‍ലമെന്റിലും വഖഫുമായി ബന്ധപ്പെട്ട വിഷയത്തില്‍ ചര്‍ച്ചകള്‍ നടക്കുമ്പോള്‍ എതിരെ നിലപാട് സ്വീകരിച്ചവരാണ് ഇടതുവലതുമുന്നണികളെന്ന് തുഷാര്‍ വെള്ളാപ്പള്ളി. അന്ന് മുനമ്പത്തെ കുടുംബങ്ങളോടൊപ്പം നിന്നത് എന്‍ഡിഎയും എസ്എന്‍ഡിപി, ധീവര സമുദായം പോലുള്ള സമുദായ സംഘടനകളുമാണ്. അതുകൊണ്ടുതന്നെ കഴിഞ്ഞദിവസം സമരം ഒത്തുതീര്‍പ്പാക്കിയത് ശുദ്ധ തട്ടിപ്പാണെന്നും അദ്ദേഹം പറഞ്ഞു.
ഹൈക്കോടതി നല്‍കിയിട്ടുള്ള നിര്‍ദേശപ്രകാരം നേരത്തെ നടപ്പിലാക്കേണ്ട കാര്യങ്ങളാണ് ഇപ്പോള്‍ തെരഞ്ഞെടുപ്പിനിടയില്‍ ജനങ്ങളെ തെറ്റിദ്ധരിപ്പിക്കാന്‍ മന്ത്രി രാജനും മന്ത്രി പി. രാജീവും ചേര്‍ന്ന് നടത്തുന്നത്. കരമടയ്‌ക്കാനുള്ള ഏര്‍പ്പാട് ഹൈക്കോടതി പലസമയങ്ങളിലായി പ്രഖ്യാപിച്ചതാണ്. മുനമ്പത്ത് നടക്കുന്ന സമരം ഏതെങ്കിലും രാഷ്‌ട്രീയ പാര്‍ട്ടിയുടെ നേതൃത്വത്തിലല്ലെന്നും തുഷാര്‍ പറഞ്ഞു.
തദ്ദേശ തെരഞ്ഞെടുപ്പില്‍ വന്‍ വിജയം നേടും. എന്‍ഡിഎയുടെ ചരിത്രത്തിലാദ്യമായാണ് ഇത്രയും സ്ഥാനാര്‍ത്ഥികളെ മത്സരിപ്പിക്കുന്നത്. 23,000 വാര്‍ഡുകളില്‍ 20,065 സ്ഥാനാര്‍ത്ഥികളുണ്ടെന്നും അദ്ദേഹം വ്യക്തമാക്കി.
എല്ലാ കോര്‍പ്പറേഷന്‍, മുനിസിപ്പാലിറ്റി, പഞ്ചായത്തുകളിലും എന്‍ഡിഎ വികസനരേഖ ഇറക്കി. ജനവിരുദ്ധ, വികസന വിരുദ്ധ പ്രവര്‍ത്തനങ്ങള്‍ക്കെതിരെ കുറ്റപത്രവും അവതരിപ്പിച്ചാണ് തെരഞ്ഞെടുപ്പിനെ നേരിടുന്നത്.
കേന്ദ്ര പദ്ധതികള്‍ നടപ്പാക്കാന്‍ എല്ലാ വാര്‍ഡുകളിലും വികസിത ടീമിനെ നിശ്ചയിച്ചിട്ടുണ്ട്. ഓരോ വാര്‍ഡിലും എന്ത് വികസനമാണ് വേണ്ടതെന്നു മനസിലാക്കി അതിന്റെ രേഖകള്‍ തയാറാക്കിയാണ് മത്സരിക്കുന്നത്. ശബരിമല സ്വര്‍ണക്കൊള്ളയാണ് രണ്ടാമത് എന്‍ഡിഎ അവതരിപ്പിച്ച വിഷയം. ആയിരക്കണക്കിന് അയ്യപ്പഭക്തന്മാര്‍ക്ക് കുടിവെള്ളവും പ്രാഥമിക സൗകര്യങ്ങളും നല്കാതെ കഷ്ടപ്പെടുത്തിയ സംഭവങ്ങള്‍ ജനങ്ങളെ ബോധ്യമാക്കി മുന്നോട്ടുപോകും. ശബരിമലയില്‍ ഭക്തര്‍ നേരിടുന്ന കഷ്ടതകള്‍ പ്രചരണ വിഷയമാക്കും, അദ്ദേഹം പറഞ്ഞു.
