ന്യൂദല്‍ഹി: അസം, അരുണാചല്‍ പ്രദേശ് ഉള്‍പ്പെടെയുള്ള ഏഴ് വടക്ക് കിഴക്കന്‍ സംസ്ഥാനങ്ങളെ ഇന്ത്യയുമായി യോജിപ്പിക്കുന്ന ഭൂപ്രദേശം വെറും 22 കിലോമീറ്റര്‍ മാത്രം വീതിയുള്ള സിലിഗുരിയാണ്. ഇതിന്റെ വീതിക്കുറവ് കാരണം ഇന്ത്യയുടെ കോഴിക്കഴുത്ത് (ചിക്കന്‍ നെക്ക് ) എന്നാണ് വിശേഷിപ്പിക്കുന്നത്. ബംഗ്ലാദേശും പാകിസ്ഥാനും ഇന്ത്യയിലെ വിഘടനവാദികളായ ജിഹാദികളും ഇന്ത്യയുടെ ഈ ചിക്കന്‍ കഴുത്ത് വെട്ടി ഏഴ് വടക്ക് കിഴക്കന്‍ സംസ്ഥാനങ്ങളെയും ഇന്ത്യയില്‍ നിന്നും വേര്‍പ്പെടുത്തി ബംഗ്ലാദേശിലേക്ക് കൊണ്ടുപോകും എന്ന് നിരന്തരം ഭീഷണി മുഴക്കാറുണ്ട്. പക്ഷെ ഇനി ഈ ഭീഷണി നടപ്പില്ല. മൂന്ന് സൈനിക കേന്ദ്രങ്ങള്‍ ഇവിടെ സ്ഥാപിച്ച് സിലിഗുരിയെ ജിഹാദികള്‍ക്ക് ബാലികേറാമലയാക്കുകയാണ് ഇന്ത്യന്‍ സൈന്യം. രഹസ്യസേനകള്‍ നല്‍കിയ വിവരമനുസരിച്ചാണ് ഈ സൈനിക നീക്കം.
53പേരുടെ മരണത്തിനിടയാക്കിയ ദല്‍ഹി കലാപത്തിന് നേതൃത്വം നല്‍കിയ ദല്‍ഹി യൂണിവേഴ്സിറ്റി വിദ്യാര്‍ത്ഥികളായ ഉമര്‍ ഖാലിദും ഷെര്‍ജില്‍ ഇമാമും അവരുടെ പ്രസംഗത്തില്‍ ഇന്ത്യയുടെ ചിക്കന്‍ കഴുത്തില്‍ കല്ലും വണ്ടിയും തടികളും കൊണ്ടിച്ച് വാഹനഗതാഗതം തടസ്സപ്പെടുത്തണമെന്നും അതുവഴി ഏഴ് വടക്ക് കിഴക്കന്‍ സംസ്ഥാനങ്ങളിലേക്കും പാലും വെള്ളവും തടയാമെന്നും പ്രസംഗിച്ചിരുന്നു. ഇതുവഴി അവിടെയും ജനങ്ങളെ കലാപത്തിന് പ്രേരിപ്പിക്കുകയായിരുന്നു ഇവരുടെ ലക്ഷ്യം.
ഓപ്പറേഷന്‍ സിന്ദൂര്‍ നാളുകളില്‍ ഇന്ത്യ പാകിസ്ഥാനെ ആക്രമിച്ചാല്‍ ഇന്ത്യയുടെ ചിക്കന്‍ നെക്ക് വെട്ടി ഏഴ് വടക്കുകിഴക്കന്‍ സംസ്ഥാനങ്ങളെ ബംഗ്ലാദേശിനോട് ചേര്‍ക്കുമെന്ന് ബംഗ്ലാദേശ് മുന്‍ പ്രതിരോധമന്ത്രി ഫസ് ലൂര്‍ റഹ്മാന്‍ പ്രസ്താവിച്ചിരുന്നു.
ധുബ്രിയിലെ ലജിത് ബൊര്‍ഫുകന്‍ , ബീഹാറിലെ കിഷന്‍ ഗഞ്ച്, ബംഗാളിലെ ചൊപ്ര എന്നിവിടങ്ങലിലാണ് സൈനികകേന്ദ്രം സ്ഥാപിക്കുന്നത്. ഇതോടെ സിലിഗുരിയില്‍ എന്തെങ്കിലും ശത്രുനീക്കമുണ്ടായാല്‍ ഞൊടിയിടയില്‍ ഈ കേന്ദ്രങ്ങളില്‍ നിന്നും സൈന്യത്തെ വിന്യസിക്കാന്‍ സാധിക്കും. ബംഗ്ലാദേശിലെ കലങ്ങിമറിയുന്ന രാഷ്‌ട്രീയസാഹചര്യമാണ് ഇതിന് പ്രേരിപ്പിച്ചത്.
