കൊച്ചി: ശബരിമല സന്നിധാനത്തെയും മാളികപ്പുറത്തെയും മേല്ശാന്തിമാരും ഉള്ക്കഴകത്തെ ശാന്തിമാരും അഭിഷേത്തിനുപയോഗിച്ച നെയ് ഭക്തര്ക്കു വില്ക്കുന്നതു ഹൈക്കോടതി തടഞ്ഞു. അവരുടെ മുറികളില് സൂക്ഷിച്ചിരിക്കുന്ന നെയ്യെല്ലാം തിരുവിതാംകൂര് ദേവസ്വം ബോര്ഡ് അധികാരിക്ക് ഉടന് കൈമാറാനും കോടതി നിര്ദേശിച്ചു.
ദേവസ്വം ബോര്ഡ് നല്കുന്ന ടിക്കറ്റുകളിലേ നെയ്യഭിഷേകം നടത്താവൂയെന്നും അത്തരം ടിക്കറ്റുകള് കൃത്യമായി നല്കണമെന്നും കോടതി ഉത്തരവിട്ടു.
സന്നിധാനത്തെയും മാളികപ്പുറത്തെയും മേല്ശാന്തിമാരുടെ മുറികളില് നിന്ന് ‘ആദിയ ശിഷ്ടം നെയ്’ (അഭിഷേകത്തിനുള്ള നെയ്) നിയമ വിരുദ്ധമായി വില്ക്കുന്നതു സംബന്ധിച്ച് ശബരിമല സ്പെഷല് കമ്മിഷണറുടെ റിപ്പോര്ട്ട് പരിഗണിക്കുന്നതിനിടെയാണ് ജസ്റ്റിസ് വി. രാജ വിജയ രാഘവന്, ജസ്റ്റിസ് കെ.വി. ജയകുമാര് എന്നിവരടങ്ങിയ ബെഞ്ച് നിര്ദേശങ്ങള് നല്കിയത്.
തന്ത്രി, മേല്ശാന്തി, ഉള്ക്കഴകം എന്നിവരുടെ മുറികളില് ഭക്തരില് നിന്നു നെയ് ശേഖരിച്ച ശേഷം അഭിഷേകം നടത്തുന്ന രീതി ഉടന് നിര്ത്തണമെന്നും കോടതി നിര്ദേശിച്ചു. സന്നിധാനത്ത് ‘നെയ്യഭിഷേക നെയ്’ കൈകാര്യം ചെയ്യുന്നതില് പാലിക്കുന്ന പ്രോട്ടോക്കോള് സംബന്ധിച്ച് കോടതി തിരുവിതാംകൂര് ദേവസ്വം ബോര്ഡില് നിന്നു പ്രത്യേക നിര്ദേശങ്ങള് തേടി.
