കൊല്‍ക്കത്ത: ജനങ്ങളുടെ മോഹങ്ങള്‍, പ്രതീക്ഷകള്‍, പ്രശ്‌നങ്ങള്‍, വെല്ലുവിളികള്‍, ആവശ്യങ്ങള്‍ എന്നിവയോട് സജീവമായി പ്രതികരിക്കാനുള്ള അദമ്യമായ ആഗ്രഹത്തിന്റെ ഫലമായാണ് ജനരാജ് ഭവന്‍ എന്ന സങ്കല്പം ഉടലെടുത്തതെന്ന് ബംഗാള്‍ ഗവര്‍ണര്‍ ഡോ.സി.വി. ആനന്ദബോസ് എക്‌സില്‍ കുറിച്ചു. അതിന് രാജ്ഭവനുമായി ബന്ധപ്പെട്ട ഭീതിയും അത്ഭുതവും അകറ്റി എല്ലാ വിഭാഗങ്ങളിലുമുള്ള ജനങ്ങള്‍ക്ക് പ്രാപ്തമാക്കേണ്ടതുണ്ടായിരുന്നു.
രണ്ടു വര്‍ഷം മുന്‍പ് രാജ്ഭവന്റെ പ്രതീകാത്മക താക്കോല്‍, മുഖ്യമന്ത്രി മമതാ ബാനര്‍ജിയെ ഏല്‍പ്പിക്കാനും രാജ്ഭവന്‍ ജനരാജ് ഭവന്‍ എന്ന് പുനര്‍നാമകരണം ചെയ്യാനും ഞാന്‍ രാഷ്‌ട്രപതിയോട് അഭ്യര്‍ഥിച്ചിരുന്നു. ഇക്കാര്യം ഗവര്‍ണര്‍മാരുടെ സമ്മേളനത്തില്‍ ചര്‍ച്ച ചെയ്തു. രാജ്ഭവന്‍ ജനങ്ങള്‍ക്ക് പ്രാപ്തമാക്കണമെന്ന് പ്രധാനമന്ത്രി നരേന്ദ്ര മോദിയും പറഞ്ഞു. പേരിനു വേണ്ടി മാത്രമല്ല, അതിന്റെ അന്തസത്തയും പ്രധാനമാണ്. ഇത് (ലോക്ഭവന്‍) ഭരണഘടനയില്‍ പറയുന്ന, ജനങ്ങളുടെ പരമാധികാരം ഉറപ്പിക്കുന്നു, പുതിയ തലമുറയ്‌ക്കുള്ള സന്ദശമാണ്. അദ്ദേഹം പറഞ്ഞു.
ലോക്ഭവന്‍ എല്ലാ വിഭാഗം ജനങ്ങള്‍ക്കും എത്താന്‍ കഴിയുന്ന ഗവര്‍ണറുടെ ഓഫീസായും ഔദ്യോഗിക വസതിയായും പ്രവര്‍ത്തിക്കും. അദ്ദേഹം അറിയിച്ചു.
