തിരുവനന്തപുരം: സ്വാമി ഈശയുടെ 75-ാം പിറന്നാള്‍ ആഘോഷം പശ്ചിമ ബംഗാള്‍ ഗവര്‍ണര്‍ ഡോ. സി.വി. ആനന്ദബോസ് ഉദ്ഘാടനം ചെയ്തു. അമ്മയാണ് ഏറ്റവും വലിയ അധ്യാപിക എന്നും നമ്മുടെ മനസില്‍ മൂല്യബോധം ഉണ്ടാക്കിത്തരുന്നത് അമ്മയാണ് എന്നും അദ്ദേഹം പറഞ്ഞു. ഒബ്ജക്റ്റീവ് വിദ്യാഭ്യാസം കൊണ്ട് മാത്രം ഒരു സമൂഹത്തിന് ശ്രേയസ് ഉണ്ടാകുമെന്ന് കരുതുന്നത് ശരിയല്ല. സ്വന്തം അമ്മയില്‍ നിന്ന് പഠിക്കുന്നതില്‍ അപ്പുറത്ത് ഒന്നും നാം പഠിക്കുന്നില്ല. അമ്മ എന്നു പറഞ്ഞാല്‍ വിശ്വാസവും സ്‌നേഹവും ത്യാഗവുമാണ് എന്നും അദ്ദേഹം പറഞ്ഞു.
വസ്തുനിഷ്ഠമായ വിദ്യാഭ്യാസവും ആത്മനിഷ്ഠമായ വിദ്യാഭ്യാസവും തമ്മിലുള്ള വ്യത്യാസം ലോകത്തെ മനസിലാക്കാന്‍ വേണ്ടിയാണ് സ്വാമിജി കഴിഞ്ഞ മൂന്ന് പതിറ്റാണ്ടോളമായി ശ്രമിച്ചുകൊണ്ടിരിക്കുന്നത്. അത് സമൂഹം ഉള്‍ക്കൊണ്ടതിന്റെ പ്രതിഫലനമായാണ് രണ്ട് ദിവസങ്ങള്‍ കൂടി കഴിയുമ്പോള്‍ കേന്ദ്ര വിദ്യാഭ്യാസ മന്ത്രി ഇതിനെക്കുറിച്ച് പഠിക്കാന്‍ കേരളത്തില്‍ വരുന്നതെന്ന് ആനന്ദബോസ് പറഞ്ഞു.
തിരുവനന്തപുരത്ത് മസ്‌കറ്റ് ഹോട്ടലില്‍ നടന്ന ചടങ്ങില്‍ രമേശ് ചെന്നിത്തല എംഎല്‍എ അധ്യക്ഷനായിരുന്നു. കടകംപള്ളി സുരേന്ദ്രന്‍ എംഎല്‍എ, ഹാബിറ്റാറ്റ് ഗ്രൂപ്പ് സ്ഥാപകന്‍ ഡോ. ജി. ശങ്കര്‍, ഡോ. എം.ആര്‍. തമ്പാന്‍, ഈശ വിദ്യാലയം പ്രിന്‍സിപ്പല്‍ മുരളീധരന്‍ നായര്‍ തുടങ്ങിയവര്‍ സംസാരിച്ചു.
