തിരുവനന്തപുരം: തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് കെ. ജയകുമാറിന്റെ പേഴ്‌സണല്‍ സെക്രട്ടറിയായി പിണറായി സര്‍ക്കാര്‍ പ്രതിഷ്ഠിച്ച ജി. ബിനു അന്നദാനത്തില്‍ തീവെട്ടിക്കൊള്ള. തിരുവല്ലം പരശുരാമക്ഷേത്രത്തില്‍ അഡ്മിനിസ്‌ട്രേറ്റര്‍ ഓഫീസര്‍ ആയിരിക്കെ ഇയാള്‍ തട്ടിയെടുത്തത് നാല് ലക്ഷത്തിലധികം രൂപ. മുന്‍ ദേവസ്വം ബോര്‍ഡ് പ്രസിഡന്റിന്റെ പേഴ്‌സണല്‍ അസിസ്റ്റന്റും ബിനു ആയിരുന്നു.
നിത്യേന 1200 പേര്‍ക്ക് അന്നദാനം നടത്തിയെന്ന് കാണിച്ചാണ് പണം തട്ടിയെടുത്തത്. സത്യത്തില്‍ ഇരുന്നൂറില്‍ താഴെ ഭക്തരാണ് അന്നദാനത്തില്‍ പങ്കെടുക്കുന്നത്. ബിനു തിരുവല്ലത്ത് എത്തിയതോടെ ബോര്‍ഡിനെ സ്വാധീനിച്ച് അന്നദാനത്തിനുള്ള തുകയും എണ്ണവും വര്‍ദ്ധിപ്പിച്ചു.
അന്നദാനം ആളൊന്നിന് 30 രൂപയായിരുന്നു ഈടാക്കിയിരുന്നത്. സപ്ലയര്‍ എന്ന് ദേവസ്വം ബോര്‍ഡില്‍ പറയുന്ന അഡ്മിനിസ്‌ട്രേറ്റര്‍ക്ക് 18 രൂപയും 12 രൂപ ദേവസ്വം ബോര്‍ഡിനും.
ബിനു എത്തിയതോടെ നിരക്ക് 40 രൂപയാക്കി. കഴിക്കുന്നവരുടെ എണ്ണം അഞ്ഞൂറില്‍ നിന്നും 1200 ആക്കി ഉയര്‍ത്തി. 25 രൂപ സപ്ലയര്‍ക്കും 15 രൂപ മുതല്‍ക്കൂട്ടും. സപ്ലയറാണ് അന്നദാനത്തിനു വേണ്ട സാധനങ്ങള്‍ വാങ്ങിക്കുന്നത്.
ഇനിയാണ് ജി. ബിനു നടത്തിയ തട്ടിപ്പിന്റെ രസക്കൂട്ട്. ബലികര്‍മങ്ങള്‍ക്കാണ് തിരുവല്ലം ക്ഷേത്രത്തില്‍ ഭക്തര്‍ കൂടുതല്‍ എത്തുന്നത്. രാവിലെ ചടങ്ങുകള്‍ ആരംഭിക്കും. 11 മണിയോടെ അവസാനിക്കും. ഈ സമയം നൂറോളം പേരേ ക്ഷേത്രത്തിലുണ്ടാകാറുള്ളൂ. വിശേഷ ദിവസങ്ങളില്‍ ഇരുന്നൂറോളം പേരും. കഞ്ഞിയാണ് നല്‍കുന്നത്. മിക്ക ദിവസങ്ങളിലും ഇത് ആരുടെയെങ്കിലും സംഭാവനയായിരിക്കും. ഭക്ഷണം നല്‍കുന്നത് 10 മണിക്ക് ശേഷവും.
ദേവസ്വം ബോര്‍ഡ് തീരുമാനിച്ചതിന്റെ നാലിലൊന്ന് പേരുപോലും ഭക്ഷണം കഴിക്കാന്‍ ഉണ്ടാകാറില്ല. എന്നാല്‍ ഭക്ഷണ വിതരണ കണക്കില്‍ ആയിരം മുതല്‍ ആയിരത്തി ഇരുന്നൂറ് പേരും. സംഭാവനയായി എത്തുന്ന അരിയടക്കം പണം നല്‍കി വാങ്ങിയ കണക്കില്‍ ഉള്‍പ്പെടുത്തും. ഒന്നര വര്‍ഷത്തോളമായി ബിനു അന്നദാനത്തിന്റെ എണ്ണം ക്രമീകരിക്കാന്‍ രജിസ്റ്റര്‍ കൂപ്പണും പ്രത്യേക ഫണ്ടും തുടങ്ങിയിട്ട്. ബോര്‍ഡിലെ എല്ലാനിര്‍ദ്ദേശങ്ങളും കാറ്റില്‍ പറത്തിയാണ് പണം തട്ടിയെടുത്തത്. വിശേഷദിവസങ്ങളുടെ പട്ടികയില്‍ യാതൊരു വിശേഷവും ഇല്ലാത്ത ഞായറാഴ്ചകളും ചേര്‍ത്ത് ആയിരത്തിലധികം പേര്‍ക്ക് അന്നദാനം നല്‍കിയെന്ന് കാണിച്ച് പണം തട്ടിയെടുത്തു. ഇത് സംബന്ധിച്ച് അന്വേഷണം നടത്തിയെങ്കിലും സര്‍ക്കാരിന്റെ സ്വാധീനത്തില്‍ എല്ലാം ഫയലില്‍ ഒതുങ്ങി.
