ന്യൂദല്ഹി: ഓപ്പറേഷന് സിന്ദൂറിന്റെ വിജയം ഭീകരവിരുദ്ധ, പ്രതിരോധ തന്ത്രത്തിലെ നിര്ണായക നിമിഷമെന്ന് രാഷ്ട്രപതി ദ്രൗപദി മുര്മു. കരസേന സംഘടിപ്പിച്ച ചാണക്യ ഡിഫന്സ് ഡയലോഗിന്റെ മൂന്നാംപതിപ്പ് ഉദ്ഘാടനം ചെയ്യുകയായിരുന്നു രാഷ്ട്രപതി.
ഓപ്പറേഷന് സിന്ദൂറിലൂടെ ഭാരതത്തിന്റെ സൈനിക ശേഷി മാത്രമല്ല, സമാധാനം പാലിക്കുന്നതില് ദൃഢവും എന്നാല് ഉത്തരവാദിത്തത്തോടെയും പ്രവര്ത്തിക്കാനുള്ള ധാര്മികതയും ലോകം അറിഞ്ഞു. പ്രവര്ത്തനപരമായ പങ്കിനപ്പുറം സൈന്യം ദേശീയ വികസനത്തിന്റെ ഒരു സ്തംഭമായി തുടരുന്നു. അതിര്ത്തികള് ശക്തിപ്പെടുത്തുന്നതിന് പുറമേ, അടിസ്ഥാന സൗകര്യങ്ങള്, കണക്ടിവിറ്റി, വിനോദ സഞ്ചാരം, വിദ്യാഭ്യാസം എന്നിവയിലൂടെ അതിര്ത്തി പ്രദേശത്തിന്റെ വികസനത്തിലും സഹായം നല്കുന്നു.
സൈബര്, ബഹിരാകാശം, വൈജ്ഞാനികം തുടങ്ങിയ നവീനമേഖലകളിലെ മത്സരങ്ങള് സമാധാനത്തിനും സംഘര്ഷത്തിനുമിടയിലുള്ള അതിര്വരമ്പുകള്ക്ക് മങ്ങലേല്പ്പിക്കുന്നുണ്ട്. നയതന്ത്രം, സാമ്പത്തികശക്തി, സൈന്യം എന്നിവയുടെ യോജിച്ചുള്ള പ്രവര്ത്തനത്തിലൂടെ, സമാധാനം ലക്ഷ്യമാക്കുന്ന ഒരു രാഷ്ട്രമായി ഭാരതം ലോകത്തിന് മുന്നില് നില്ക്കുന്നു. ഭാവിയിലെ വെല്ലുവിളികളെ നേരിടാനും എല്ലാ രംഗങ്ങളിലും കാര്യക്ഷമത പുലര്ത്താനുമായി ദീര്ഘകാല നടപടികളിലൂടെ സൈന്യം സ്വയം പരിവര്ത്തനത്തിന് വിധേയമായിക്കൊണ്ടിരിക്കുന്നു. ഈ പ്രതിരോധ പരിഷ്കാരങ്ങള് ഭാരതത്തെ സ്വയം പര്യാപ്തമാക്കാന് സഹായിക്കും. 2047ല് വികസിത ഭാരതം എന്ന ലക്ഷ്യം സാക്ഷാത്കരിക്കാന് നമ്മുടെ സൈന്യം മികവിനായി തുടര്ച്ചയായി പരിശ്രമിക്കുകയും ദൃഢനിശ്ചയത്തോടും പ്രതിബദ്ധതയോടും മുന്നേറുകയും ചെയ്യുമെന്നും രാഷ്ട്രപതി കൂട്ടിച്ചേര്ത്തു. കരസേന മേധാവി ജനറല് ഉപേന്ദ്ര ദ്വിവേദി രാഷ്ട്രപതിക്ക് ഉപഹാരം സമര്പ്പിച്ചു.
