കൊച്ചി: മുനമ്പം വിഷയത്തില് സംസ്ഥാന സര്ക്കാര് ഇരട്ടത്താപ്പ് കളിക്കുന്നതായി ബിജെപി സംസ്ഥാന വൈസ് പ്രസിഡന്റ് ഷോണ് ജോര്ജ്.
ഹൈക്കോടതി വിധി ഉണ്ടായിട്ടുപോലും മുനമ്പം ഭൂമി വഖഫ് അല്ലെന്ന് പറയാന് മന്ത്രി പി. രാജീവ് തയാറാകാത്തത് ദൗര്ഭാഗ്യകരമാണ്. വഖഫ് ഭേദഗതി നിയമം വന്നപ്പോള് ഒരുമിച്ച് കൈപൊക്കിയവരാണ് ഇടതുപക്ഷവും വലതുപക്ഷവും. കേരള ഹൈക്കോടതി ഡിവിഷന് ബെഞ്ചിന്റെ ഉത്തരവിനെതിരെ വഖഫ് സംരക്ഷണ സമിതി സുപ്രീംകോടതിയില് ഫയല് ചെയ്തിട്ടുള്ള അപ്പീലില് കേന്ദ്ര സര്ക്കാര് കക്ഷി ചേരണമെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് കേന്ദ്രത്തോട് ആവശ്യപ്പെട്ടിട്ടുണ്ടെന്നും അദ്ദേഹം അറിയിച്ചു.
വഖഫ് ഭേദഗതി നിയമത്തിനെതിരെ കേരള നിയമസഭ ഒന്നാകെ പ്രമേയം പാസാക്കിയതാണ്. എന്നിട്ട് ഇപ്പോള് പറയുന്നത് വഖഫ് ഭേദഗതി നിയമം ഞങ്ങള് അംഗീകരിക്കുന്നില്ലെന്നാണ്. മന്ത്രി പി. രാജീവ് എവിടെയെങ്കിലും ഒന്ന് ഉറച്ച് നില്ക്കണം. ഇന്ന് ചോദിച്ചപ്പോള് പോലും മന്ത്രി പറഞ്ഞത് മുനമ്പം ഭൂമി വഖഫ് ആണോ അല്ലയോ എന്ന് ഞാന് പറയുന്നില്ലെന്നാണ്. കോടതി പറഞ്ഞ ഒരു കാര്യം പോലും പറയാന് ഇവര്ക്ക് തന്റേടമില്ല. ഇവര് ആരെയാണ് ഭയപ്പെടുന്നതെന്നും ഷോണ് ജോര്ജ് ചോദിച്ചു. ഒക്ടോ. 19-ാം തീയതി മുനമ്പം വഖഫ് ഭൂമി അല്ലെന്ന് ഹൈക്കോടതി വിധി വന്നിട്ട് ഇത്രയും ദിവസം വസ്തു പോക്കുവരവ് ചെയ്യാതെ വെച്ചുകൊണ്ടിരിക്കുകയായിരുന്നു.
മുനമ്പത്തെ ജനങ്ങള്ക്ക് പൂര്ണ അവകാശം കിട്ടുന്നത് വരെ, നിയമ പോരാട്ടങ്ങള്ക്ക് ഞങ്ങള് ഉണ്ടാകും. സുപ്രീംകോടതിയില് അവര്ക്ക് കാവലായി ബിജെപി ഉണ്ടാകും. വിഷയത്തില് സിപിഎമ്മിന്റെയും കോണ്ഗ്രസിന്റെയും നിലപാടുകള് അപഹാസ്യമാണെന്നും, കോണ്ഗ്രസിന്റെ മൗനം ജനം തിരിച്ചറിയുമെന്നും ഷോണ് ജോര്ജ് പറഞ്ഞു.
മുനമ്പത്തേത് വഖഫ് ഭൂമി അല്ലെന്ന് വ്യക്തമാണ്. കരം അടയ്ക്കാന് കോടതി അനുമതി നല്കിയിട്ടുണ്ടെങ്കിലും, നടപടി സുപ്രീംകോടതിയില് നിലവിലുള്ള കേസിന് വിധേയമായിട്ടായിരിക്കും. അതിനാല് വരാനിരിക്കുന്ന സുപ്രീംകോടതി വിധി നിര്ണായകമാണെന്ന് ഷോണ് പറഞ്ഞു. ബിജെപി എറണാകുളം ജില്ലാ പ്രസിഡന്റ് കെ.എസ്. ഷൈജുവും വാര്ത്താസമ്മേളനത്തില് പങ്കെടുത്തു.
