കോട്ടയം: ഈ സ്വാതന്ത്ര്യദിനത്തില്‍ ജമാഅത്തെ ഇസ്ലാമിയുടെ തിട്ടൂരത്തിന് മുഖ്യമന്ത്രി കീഴടങ്ങുന്ന കാഴ്ചയാണ് കണ്ടതെന്ന് ബി.ജെ.പി നേതാവ് ഷോണ്‍ ജോര്‍ജ് . ജമാഅത്തെ ഇസ്ലാമിയുമായും ഇന്ത്യാവിരുദ്ധ ശക്തികളുമായും അഭേദ്യമായ ബന്ധമാണ് മുഖ്യമന്ത്രിക്കുള്ളത്. പാണക്കാട്ട് പോയി അനുമതി വാങ്ങിയിട്ടെങ്കിലും വന്ദേമാതരം പാടുമെന്നാണ് ഞങ്ങള്‍ ധരിച്ചത്.
വന്ദേമാതരം പാടേണ്ടെന്ന തരത്തില്‍ വിദ്യാഭ്യാസ വകുപ്പ് ഓര്‍ഡര്‍ ഇറക്കിയിട്ടുണ്ടെന്നാണ് അറിയുന്നത്. അങ്ങിനെയെങ്കില്‍ ആ ഉദ്യോഗസ്ഥന് പണി കാണില്ല. ദേശഭക്തി ഗാനത്തെ അപമാനിക്കുന്ന തരത്തില്‍ ആരുടെ ഭാഗത്തുനിന്നും നിലപാടുണ്ടായാലും ബിജെപി ശക്തമായ നിലപാടു സ്വീകരിക്കും. രാജ്യത്തൊരു നിയമമുണ്ടെങ്കില്‍ അത് നടപ്പിലാക്കാന്‍ മറ്റേതൊരു സംസ്ഥാനത്തെയും പോലെ കേരളത്തിനും ബാധ്യതയുണ്ട്. കേന്ദ്ര-സംസ്ഥാന ബന്ധങ്ങളെയും ഭരണഘടനാ തത്വങ്ങളെയും തള്ളിക്കളയുന്ന സംസ്ഥാന സര്‍ക്കാരിന്റെ ഈ നിലപാട് ഫെഡറല്‍ സംവിധാനത്തിന് തന്നെ എതിരാണ്. ദേശീയ താല്പര്യങ്ങള്‍ക്ക് വിരുദ്ധമായി വന്ദേമാതരത്തിനെതിരെ നിലപാടെടുക്കുന്നത് പുതിയ തലമുറയ്‌ക്ക് വളരെ തെറ്റായ സന്ദേശമാണ് നല്‍കുന്നതെന്ന് ഷോണ്‍ പറഞ്ഞു.
