ന്യൂഡൽഹി : മൂന്ന് വർഷം മുൻപ് മരിച്ച അമ്മയുടെ വേഷത്തിലെത്തി പെൻഷൻ പണം കൈപ്പറ്റിയിരുന്ന മകൻ ഒടുവിൽ കുടുങ്ങി . ഇറ്റലിയിലെ ബോർഗോ വിർജിലിയോയിലാണ് സംഭവം . 56 കാരനാണ് പിടിയിലായത് . 2022 ൽ മരിച്ചുപോയ തന്റെ അമ്മ ഗ്രാസിയേലയുടെ വേഷത്തിൽ എത്തി 80 ലക്ഷത്തോളം രൂപയാണ് ഇയാൾ തട്ടിയെടുത്തത് .
2022-ലാണ് 82 കാരി ഗ്രാസിയേല മരിച്ചത് . എന്നാൽ അമ്മയുടെ പെൻഷൻ പണം തുടർന്നും ലഭിക്കാൻ ആഗ്രഹിച്ച മകൻ മാസ്റ്റർ പ്ലാൻ തയ്യാറാക്കി . അതിനായി അമ്മയുടെ മരണം വെളിപ്പെടുത്താതെ അവരുടെ മൃതദേഹം സൂക്ഷിച്ച് വീട്ടിൽ ഒളിപ്പിച്ചു . ശേഷം അമ്മയുടെ വേഷം ധരിച്ചെത്തി പണം സ്വീകരിച്ചു. കഴിഞ്ഞ മൂന്ന് വർഷമായി ഇത് തുടരുന്നുണ്ടായിരുന്നു.
അടുത്തിടെ പുതുതായി എത്തിയ ജീവനക്കാരന് തോന്നിയ സംശയമാണ് ഇയാളെ കുടുക്കിയത് . പെൻഷൻ വാങ്ങാനെത്തുന്ന അമ്മയുടെ കൈ 85 വയസ്സുള്ള സ്ത്രീയുടേത് പോലെ തോന്നുന്നില്ലെന്ന് തോന്നിയ ജീവനക്കാരൻ ഉടൻ തന്നെ പോലീസിൽ വിവരം അറിയിച്ചു.
വിവരത്തിന്റെ അടിസ്ഥാനത്തിൽ പോലീസ് സ്ഥലത്തെത്തി വിശദമായ അന്വേഷണം നടത്തി. ഏതാനും വർഷങ്ങളായി ഇയാൾ അമ്മയെ പോലെ എത്തി പെൻഷൻ പണം കൈപ്പറ്റി വരികയാണെന്ന് കണ്ടെത്തി. ഇത്തരത്തിൽ 80 ലക്ഷം രൂപ ഇയാൾ കബളിപ്പിച്ചതായി പോലീസ് കണ്ടെത്തി. വീട്ടിൽ സൂക്ഷിച്ചിരുന്ന അമ്മ ഗ്രാസിയേലയുടെ മൃതദേഹവും പോലീസ് പിടിച്ചെടുത്തു .
