തിരുവനന്തപുരം: ശബരിമല സ്വർണപ്പാളി കടത്തുമായി എഡിജിപി എ.ശ്രീജിത്തിന് ബന്ധമുണ്ടെന്ന് ആരോപിച്ച രാഷ്ട്രീയ വിമര്ശകനും യൂട്യൂബറുമായ കെ.എം ഷാജഹാനെതിരെ കേസെടുത്ത് പോലീസ്. ശബരിമല ചീഫ് കോർഡിനേറ്റർ കൂടിയായ എസ്. ശ്രീജിത്ത് ഐപിഎസിന്റെ പരാതിയിലാണ് കേസെടുത്തിരിക്കുന്നത്.
ശബരിമല സ്വർണ്ണക്കൊള്ളയിൽ പോലീസ് സേനയ്ക്കും പങ്കുണ്ടെന്ന പ്രസ്താവന നടത്തിയെന്നാണ് എഫ്ഐആറിൽ പറയുന്നത്. യൂട്യൂബ് ചാനലിലൂടെയായായിരുന്നു കെ.എം. ഷാജഹാന്റെ വിവാദ പരാമർശം. ശ്രീജിത്ത് ഐപിഎസിനോടും പോലീസ് സേനയോടും ശബരിമലയിലെ ഭക്തജനങ്ങൾക്ക് അവമതിപ്പും അവഞ്ജയും തോന്നിപ്പിക്കുന്ന തരത്തിലാണ് കെ.എം. ഷാജഹാന്റെ പ്രസ്താവനയെന്ന് എഫ്ഐആറിൽ പറയുന്നു.
മതത്തിന്റെ അടിസ്ഥാനത്തിൽ സമുദായങ്ങൾ തമ്മിലുള്ള ശത്രുത വളർത്തി കലാപം സൃഷ്ടിക്കുകയും ചെയ്യുക എന്ന ഉദ്ദേശത്തോടെയാണ് പ്രസ്താവനയെന്നും എഫ്ഐആറിലുണ്ട്. സിപിഎം നേതാവ് കെ ജെ ഷൈനും വൈപ്പിൻ എംഎൽഎ ഉണ്ണികൃഷ്ണനുമെതിരായ സൈബർ അധിക്ഷേപ കേസില് സെപ്റ്റംബറില് കെ.എം ഷാജഹാനെ പോലീസ് അറസ്റ്റ് ചെയ്തിരുന്നു.
