ചെന്നൈ: കോയമ്പത്തൂരിലും മധുരയിലും മെട്രോ റെയില് പദ്ധതി കൊണ്ടുവരാനുള്ള തമിഴ്നാട് സര്ക്കാരിന്റെ പദ്ധതി തള്ളിയതിന് പിന്നില് രാഷ്ട്രീയമില്ലെന്ന് കേന്ദ്രം. തമിഴ്നാട് സമര്പ്പിച്ച ഡിപിആര് (ഡീറ്റെയില്ഡ് പ്രൊജക്ട് റിപ്പോര്ട്ട് ) ശരിയല്ലാത്തതുകൊണ്ടാണ് മെട്രോ റെയില് പദ്ധതി കേന്ദ്രം തള്ളിയത്.
പകരം രാഷ്ട്രീയം കാരണമാണ് തമിഴ്നാടിന്റെ മെട്രോ പദ്ധതി കേന്ദ്രം തള്ളിക്കളഞ്ഞതെന്ന പ്രചാരണമാണ് ഡിഎംകെ നടത്തുന്നത്. നാഷണല് മെട്രോ നയമനുസരിച്ച് ഒരു നഗരത്തില് മെട്രോ റെയില് അനുവദിക്കണമെങ്കില് അവിടെ കുറഞ്ഞത് 20 ലക്ഷം ജനസംഖ്യ വേണമെന്നുണ്ട്. എന്നാല് മധുരയിലെ ജനസംഖ്യ 15 ലക്ഷം മാത്രമാണെങ്കില് കോയമ്പത്തൂരിലെ ജനസംഖ്യ 15.8 ലക്ഷം മാത്രമാണ്. അതിനാലാണ് തമിഴ്നാട് സര്ക്കാരിന്റെ മെട്രോ പദ്ധതിക്ക് വേണ്ടിയുള്ള ഡിപിആര് കേന്ദ്രം തിരിച്ചയച്ചത്. ബീഹാറിലെ പട്നയിലും മധ്യപ്രദേശിലെ ഇന്ഡോറിലും മെട്രോ അനുവദിച്ചു എന്നതാണ് തമിഴ്നാടിന്റെ വാദം. പക്ഷെ പട്ന, ഇന്ഡോര് എന്നിവ 20 ലക്ഷത്തേക്കാളും തലനാരിഴയ്ക്ക് മാത്രം ജനസംഖ്യയില് കുറവുള്ള നഗരങ്ങളാണ്. രണ്ടിടത്തും 19.8 ലക്ഷമാണ് ജനസംഖ്യ. ‘ഒരു സംസ്ഥാനത്ത് മെട്രോ അനുവദിക്കണമെങ്കില് ആ സംസ്ഥാനസര്ക്കാരിന്റെ മുന് ട്രാക്ക് റെക്കോഡുകള് പരിശോധിക്കും. ഒരു സംസ്ഥാന സര്ക്കാരിന്റെ ജിഎസ് ഡിപിയുടെ ശതമാനത്തിലുള്ള ഡെബ്റ്റ് ടു ഇക്വിറ്റിയും പരിശോധിക്കും. തമിഴ്നാടിന്റെ ജിഎസ് ഡിപിയിന്മേലുള്ള കടം 8.37 ലക്ഷം കോടിയാണ്. പക്ഷെ അനൗദ്യോഗികകണക്കുകള് പറയുന്നത് ഇത് 11.37 ലക്ഷം കോടി വരുമെന്നാണ്. ഇത് റിസര്വ്വ് ബാങ്കിന്റെ സഹനപരിധിക്കപ്പുറമാണ്. ഇപ്പോള് തമിഴ്നാട് ഒരോ മൂന്ന് മാസത്തിലും 65000 കോടി രൂപയാണ് റിസര്വ്വ് ബാങ്കില് നിന്നും കടമെടുക്കുന്നത്. ഏതെങ്കിലും ഒരു ത്രൈമാസത്തില് ഇത് കിട്ടിയില്ലെങ്കില് തമിഴ്നാടിന്റെ മുന്നോട്ടുള്ള പോക്ക് തന്നെ അപകടത്തിലാകും എന്നതാണ് സ്ഥിതി.’-ബിജെപി ദേശീയ വക്താവ് സഞ്ജു വര്മ്മ പറയുന്നു.
നാച്വറല് ഫാമിംഗ് ഉച്ചകോടിയില് പങ്കെടുക്കാനാണ് മോദി മൂന്ന് ദിവസം മുന്പ് കോയമ്പത്തൂരില് എത്തിയത്. എന്നാല് പ്രധാനമന്ത്രിയെ ഇക്കുറിയും തമിഴ്നാട് മുഖ്യമന്ത്രി സ്റ്റാലിന് അപമാനിക്കുകയായിരുന്നു. രാജ്യത്തിന്റെ പ്രധാനമന്ത്രി എത്തുമ്പോള് വിമാനത്താവളത്തില് എത്തി സ്വീകരിക്കാനോ കോയമ്പത്തൂരില് നടക്കുന്ന പരിപാടിയില് അദ്ദേഹത്തെ അനുഗമിക്കാനോ സ്റ്റാലിന് തയ്യാറായില്ല. സ്റ്റാലിന് ആവശ്യം കേന്ദ്രത്തില് നിന്നും പണം മാത്രമാണ്. തമിഴ്നാട് ഏതോ ഒരു സ്വതന്ത്രരാജ്യം പോലെയാണ് സ്റ്റാലിന് ഭരിയ്ക്കുന്നത്.
കഴിഞ്ഞ രണ്ട് വര്ഷമായി കേന്ദ്രവും തമിഴ്നാട് സര്ക്കാരും തമ്മില് പല വിഷയങ്ങളിലും അഭിപ്രായഭിന്നതകള് ഉണ്ട്. നീറ്റ്, ദേശീയ വിദ്യാഭ്യാസനയം, ഭാഷായുദ്ധം എന്നിങ്ങനെ വിവിധ വിഷയങ്ങളില് ഇരുവരും ഏറ്റുമുട്ടിയിട്ടുണ്ട്. ഇപ്പോഴിതാ മെട്രൊ റെയില് പദ്ധതിയും ഏറ്റവും പുതിയ യുദ്ധത്തിന് വഴിയൊരുക്കിയിരിക്കുകയാണ്.
