എമ്പുരാനിൽ ചെയ്തത് തെറ്റാണെന്ന് തോന്നിയിട്ടില്ലെന്ന് നടൻ പൃഥ്വിരാജ് . സ്വകാര്യ മാധ്യമത്തിന് നൽകിയ അഭിമുഖത്തിൽ സംസാരിക്കുകയായിരുന്നു പൃഥ്വിരാജ് . എമ്പുരാനുമായി ബന്ധപ്പെട്ട് ഉണ്ടായ ആക്രമണം തന്നെ ബാധിക്കണമെങ്കിൽ ചെയ്തത് തെറ്റാണെന്ന് ബോധ്യപ്പെടണമെന്നാണ് പൃഥ്വിരാജ് പറയുന്നത് .
‘ ഒരു പ്രത്യേക ഉദ്ദേശത്തോടെയാണ് ഞാൻ ആ സിനിമ ചെയ്തതെങ്കിൽ അതിന്റെ തിരിച്ചടിയാണെന്നു മനസ്സിലാക്കാം. അതല്ല എന്ന് എനിക്കു പൂർണ ബോധ്യമുണ്ട്. പ്രേക്ഷകരെ രസിപ്പിക്കുകയെന്ന ഒറ്റ ഉദ്ദേശമേ എനിക്കുള്ളു. അതിൽ ഞാൻ പരാജയപ്പെട്ടെങ്കിൽ അംഗീകരിക്കുന്നു. അത് അടുത്ത സിനിമയിൽ ഞാൻ പരിഹരിക്കും. കുരുതി എന്ന സിനിമ ഞാൻ ചെയ്തത് എമ്പുരാന്റെ വിപരീത ആഖ്യാനമാണ്. കേൾക്കുന്ന കഥ ബോധ്യപ്പെടുന്നതിന്റെ അടിസ്ഥാനത്തിലാണ് ഞാൻ സിനിമ ചെയ്യുന്നത്. എന്റെ രാഷ്‌ട്രീയ നിലപാടു പറയാൻ വേണ്ടി ഒരു സിനിമ ഞാൻ ചെയ്യില്ല. കോടികൾ മുടക്കി അതു ചെയ്യേണ്ട കാര്യമില്ല. സോഷ്യൽ മീഡിയയിൽ ഒരു കുറിപ്പ് മതിയല്ലോ.
ആളുകളുമായി നേരിട്ടു സംവദിക്കാൻ കഴിയുമല്ലോ എന്നതിനാൽ സോഷ്യൽ മീഡിയയിൽ അഭിപ്രായം പറയാമെന്നു ഞാൻ മുൻപു കരുതിയിരുന്നു. നിർഭാഗ്യവശാൽ സോഷ്യൽ മീഡിയ ചിലർ ആയുധമാക്കുകയാണ്. രാഷ്‌ട്രീയ വിഷയങ്ങളിൽ അഭിപ്രായം പറഞ്ഞാൽ ചിലർ വില്ലനും മറ്റു ചിലർ നായകനുമാക്കുമെന്നും “ പൃഥ്വിരാജ് പറഞ്ഞു.
