ഗാന്ധിനഗര്‍ (ഗുജറാത്ത്): ജാംനഗര്‍ സന്ദര്‍ശന വേളയില്‍ അനന്ത് അംബാനിയുടെ വനതാര സന്ദര്‍ശിച്ച് ജൂനിയര്‍ ഡൊണാള്‍ഡ് ട്രംപ്. അംബാനി കുടുംബത്തിന്റെ അതിഥിയായി എത്തിയ ട്രംപിന്റെ മകന്‍, അനന്ത് അംബാനിയോടൊപ്പം ഗുജറാത്തിലെ ക്ഷേത്രങ്ങളും സന്ദര്‍ശിച്ചു. സന്ദര്‍ശന വേളയില്‍, ട്രംപ് ജൂനിയര്‍ റിലയന്‍സ് ജാംനഗര്‍ റിഫൈനറി കോംപ്ലക്സിന് അടുത്തായി സ്ഥിതി ചെയ്യുന്ന 3,000 ഏക്കര്‍ വിസ്തൃതിയുള്ള വനതാരയില്‍ എത്തുകയും അതിന്റെ വ്യാപ്തിയും മൃഗസംരക്ഷണത്തോടുള്ള പ്രതിബദ്ധതയെയുമെല്ലാം പ്രശംസിക്കുകയും ചെയ്തു.
ലോകാത്ഭുതം എന്നാണ് വനതാരയെ അദ്ദേഹം വിശേഷിപ്പിച്ചത്. വനതാരയിലേക്ക് എത്താന്‍ സാധിക്കുന്ന എതൊരാളും അവിടം സന്ദര്‍ശിക്കണമെന്ന് ട്രംപ് ജൂനിയര്‍ പറഞ്ഞു. വന്യജീവി സങ്കേതത്തിനുള്ളിലെ പ്രവര്‍ത്തനങ്ങള്‍ അവലോകനം ചെയ്യാന്‍ സമയം ചെലവഴിച്ചതിന് അനന്ത് അംബാനി അദ്ദേഹത്തോട് നന്ദി പറഞ്ഞു.
ട്രംപ് ജൂനിയറിനൊപ്പം അദ്ദേഹത്തിന്റെ സുഹൃത്തും പങ്കാളിയുമായ ബെറ്റിന ആന്‍ഡേഴ്സണും അനന്ത് അംബാനിയും രാധിക മര്‍ച്ചന്റും ഉണ്ടായിരുന്നു. അംബാനി കുടുംബം സംഘടിപ്പിച്ച സ്വകാര്യ ദണ്ഡിയ പരിപാടിയിലും പരമ്പരാഗത നൃത്ത ആഘോഷങ്ങളിലും അദ്ദേഹം പങ്കെടുത്തു. വ്യാഴാഴ്ച അദ്ദേഹം ലോകാത്ഭുതങ്ങളിലൊന്നായ താജ് മഹല്‍ സന്ദര്‍ശിച്ചരുന്നു. രാജസ്ഥാനിലെ ഉദയ്‌പൂരില്‍ നടക്കുന്ന ഒരു വിവാഹച്ചടങ്ങില്‍ പങ്കെടുക്കാനാണ് ട്രംപ് ജൂനിയറും പങ്കാളിയും ഭാരതത്തിലെത്തിയത്.
