തിരുവനന്തപുരം: ‘പെരണി നൃത്തം’ കേരളത്തിന് ആദ്യമായി പരിചയപ്പെടുത്തിയ പ്രമുഖ നര്‍ത്തകനും നാട്യഗുരുവുമായ സിറാജുദ്ദീനെ ഭാരത് സേവക് സമാജ് പുരസ്‌കാരം നല്‍കി ആദരിച്ചു. ഭാരത് സേവക് സമാജ് ദേശീയ അധ്യക്ഷന്‍ ബി.എസ്. ബാലചന്ദ്രന്‍ പുരസ്‌കാരം സമര്‍പ്പിച്ചു. രാഷ്‌ട്ര നിര്‍മ്മാണ പ്രക്രിയക്ക് സംഭാവന നല്‍കുന്നവരെ അംഗീകരിക്കുന്ന ഈ പുരസ്‌കാരം, കലാരംഗത്ത് നാട്യഗുരു സിറാജുദ്ദീന് നല്‍കിയ സംഭാവനകള്‍ കണക്കിലെടുത്താണ് സമ്മാനിച്ചത്.
വടകര കേന്ദ്രീകരിച്ച് പ്രവര്‍ത്തിക്കുന്ന ഭരത കലാക്ഷേത്ര അക്കാദമി ഓഫ് ക്ലാസിക്കല്‍ ഡാന്‍സ് എന്ന സ്ഥാപനത്തിന്റെ ഡയറക്ടറാണ് സിറാജുദ്ദന്‍. തീവ്രവും ഊര്‍ജ്ജസ്വലവുമായ പെരണി നൃത്തം കേരളത്തില്‍ ആദ്യമായി അവതരിപ്പിച്ചതും നിരവധി വേദികളില്‍ വിസ്മയക്കാഴ്ചയാക്കിയതും ഇദ്ദേഹമാണ്. ദക്ഷിണേന്ത്യയില്‍ പുരാതനകാലങ്ങളില്‍ ദേവദാസികളാല്‍ നടത്തപ്പെട്ടിരുന്ന ഈ നൃത്തവിഭാഗം, ആന്ധ്രയിലെ മാങ്കുടി ദൊരൈ രാജ് അയ്യര്‍ ഭരതനാട്യത്തിലെ മേളത്തുര്‍ ശൈലിയില്‍ വികസിപ്പിച്ചെടുത്തതാണ് ‘പെരണി നാട്യം’. കേരളത്തില്‍ വടകരയിലും തമിഴ്നാട്, ഹൈദരാബാദ് എന്നിവിടങ്ങളിലും മാത്രമേ പെരണി നൃത്തപഠനം നിലവിലുള്ളൂ എന്ന പ്രത്യേകതയുമുണ്ട്. ഈ നൃത്തം കേരളത്തില്‍ അഭ്യസിപ്പിക്കുന്നത് സിറാജുദ്ദീന് മാത്രമാണ്.
കലാരംഗത്തെ സമഗ്ര സംഭാവനകള്‍ പരിഗണിച്ച് നിരവധി ദേശീയ പുരസ്‌കാരങ്ങളാണ് ഇതിനോടകം സിറാജുദ്ദീനെ തേടിയെത്തിയത്. ജെ.സി. ഡാനിയല്‍ പുരസ്‌കാരം, ദല്‍ഹിയിലെ ‘ജെതിസ് ബെസ്റ്റ് ടീച്ചര്‍ അവാര്‍ഡ്’, പോണ്ടിച്ചേരിയിലെ ‘നൃത്താചാര്യ പുരസ്‌കാരം’, തെലങ്കാനയിലെ ‘യാദാദ്രി ദേശീയ പുരസ്‌കാരം’ എന്നിവ അതില്‍ ചിലതാണ്.
