കോഴിക്കോട്: ശബരിമല സ്വര്ണക്കൊള്ളക്കേസില് സിപിഎമ്മിനും സര്ക്കാറിനും പങ്കുണ്ടെന്ന് വ്യക്തമായിരിക്കെ മുന് ദേവസ്വം മന്ത്രി കടകംപള്ളി സുരേന്ദ്രനെ അറസ്റ്റ് ചെയ്യണമെന്ന് ബിജെപി മുന് സംസ്ഥാന അധ്യക്ഷന് കെ. സുരേന്ദ്രന്.
മുന് ദേവസ്വം പ്രസിഡന്റ് പത്മകുമാറിന്റെ അറസ്റ്റ് ശബരിമല സ്വര്ണപ്പാളി കേസില് പുതിയ വഴിത്തിരിവായിരിക്കുകയാണ്. സംഭവത്തില് സിപിഎമ്മിനും സര്ക്കാറിനും വ്യക്തമായ പങ്കുണ്ടെന്ന് തെളിയിക്കുന്നതാണ് പത്മകുമാറിന്റെ അറസ്റ്റും മൊഴിയും. കടകംപള്ളി സുരേന്ദ്രനും ഉണ്ണികൃഷ്ണന് പോറ്റിയും വളരെ അടുത്ത ബന്ധമുള്ളവരാണെന്നും സ്വര്ണക്കൊള്ള നടക്കുന്ന സമയത്ത് ഇവര് തമ്മിലും ദേവസ്വം ഓഫീസുമായും നിരന്തര സമ്പര്ക്കവുമുണ്ടായിട്ടുണ്ട് അദ്ദേഹം പറഞ്ഞു.
പത്മകുമാറിന്റെ ആസൂത്രണത്തിലാണ് ഉണ്ണികൃഷ്ണന് പോറ്റിയുടെ സ്വര്ണ്ണം പൂശല് ശിപാര്ശ കടകംപള്ളി സുരേന്ദ്രന് പരിഗണിക്കുന്നത്. ആരോപണത്തില് നിന്ന് കടകംപള്ളിക്ക് ഒഴിഞ്ഞുമാറാനാവില്ല. കൂടുതല് തെളിവുകള് നശിപ്പിക്കുന്നതിന് മുന്പ് കടകംപള്ളിയെ അറസ്റ്റ് ചെയ്ത് നിയമത്തിനു മുന്പില് കൊണ്ടുവരണം. സ്വര്ണക്കൊള്ളയുടെ പൂര്ണമായ ഉപഭോക്താവ് ഉണ്ണികൃഷ്ണന് പോറ്റി മാത്രമല്ല, മന്ത്രിമാരും പിന്നീട് വന്ന ദേവസ്വം ചുമതലയുള്ളവര്ക്കും വലിയ തോതിലുള്ള സാമ്പത്തിക സഹായം ലഭിച്ചിട്ടുണ്ട്. കടകംപള്ളി സുരേന്ദ്രന്റെ അനധികൃത സ്വത്ത് സമ്പാദനത്തിനെകുറിച്ച് അന്വേഷിക്കണം. പോലീസിന് ഇക്കാര്യങ്ങള് അന്വേഷിക്കാനുള്ള കഴിവില്ലെങ്കില് കേന്ദ്ര ഏജന്സികളെ ഏല്പ്പിക്കണം. ഇലക്ഷന് മുന്കൂട്ടി കണ്ട് പത്മകുമാറിന്റെ അറസ്റ്റ് മാത്രം ഉയര്ത്തിക്കാട്ടി വലിയ പ്രചരണത്തിനാണ് സര്ക്കാരും സിപിഎമ്മും ശ്രമിക്കുന്നത്.
ഉണ്ണികൃഷ്ണന് പോറ്റി വിശദമാക്കിയ പലകാര്യങ്ങളും ഇപ്പോഴും ബാക്കിയാണ്. അന്വേഷണം ശരിയായി നടന്നാല് ആസൂത്രണത്തിന് പിന്നിലെ പ്രധാനകളെ കണ്ടെത്താന് കഴിയും.മന്ത്രി വാസവന് ദേവസ്വം മന്ത്രിയായി തുടരാന് അവകാശമില്ല അദ്ദേഹം പറഞ്ഞു. തദ്ദേശസ്വയംഭരണ തെരഞ്ഞെടുപ്പില് യുഡിഎഫ് ജമാ അത്തെ ഇസ്ലാമിയുമായി പരസ്യ സഖ്യത്തിലാണ്. ‘ആഗോള ഇസ്ലാമിക ബോംബ്’ ന്റെ സ്ഥാനാര്ത്ഥികളെ പ്രഖ്യാപിച്ചത് തങ്ങളടക്കമുള്ള മുസ്ലിം ലീഗിന്റെ സമുന്നത നേതാക്കളാണ്. ഐഎസ് റിക്രൂട്ട്മെന്റ് നടക്കുന്ന സംസ്ഥാനമാണ് കേരളം. വൈറ്റ് കോളര് ടെററിസം സമൂഹജീവിതത്തിന്റെ വ്യത്യസ്ത മേഖലകളില് സ്ഥാനം പിടിച്ചിരിക്കുകയാണ്. ഉന്നത വിദ്യാഭ്യാസമുള്ളവരുടെ ഇടയിലും ഒരു വിഭാഗം മാധ്യമ പ്രവര്ത്തകരിലും ഇതുണ്ട്, അദ്ദേഹം പറഞ്ഞു. വാര്ത്താസമ്മേളത്തില് കോഴിക്കോട് സിറ്റി ജില്ലാ പ്രസിഡന്റ് അഡ്വ. കെ.പി. പ്രകാശ് ബാബു, സംസ്ഥാന സമിതി അംഗം പി. രഘുനാഥ് പങ്കെടുത്തു.
