പാപഗ്രഹമായാണ് ശനിയെ പൊതുവേ എല്ലാവരും കണക്കാക്കുന്നത്. എന്നാല് ശുഭനായാല് ഇത്രയധികം ശുഭത്വം പ്രദാനം ചെയ്യുന്ന വേറൊരു ഗ്രഹമില്ല. ശുഭഗ്രഹങ്ങള്ക്ക് നല്കാന് കഴിയാത്ത പല ഗുണാനുഭവങ്ങളും ശുഭനായ ശനി നല്കും. ദുഃഖകാരകത്വമുള്ള ശനിക്കുതന്നെയാണ് സ്ഥിരോത്സാഹത്തിന്റേയും ദീര്ഘായുസ്സിന്റേയും ധനലാഭത്തിന്റെയും പാതിവ്രത്യത്തിന്റെയും കാരകത്വമുള്ളത്. ജാതകത്തില് ശനി ബലവാനായാല് ജാതകന് ദീര്ഘായുസ്സായിരിക്കുമെന്ന് നിസ്സംശയം പറയാം. ബലവാനായ ശനി ശുഭക്ഷേത്ര സ്ഥിതനായി ഏഴാംഭാവത്തെയോ, ഏഴാം ഭാവാധിപനെയോ വീക്ഷിക്കുകയോ, ഏഴാം ഭാവാധിപത്യത്തോടെ ശനി സ്വക്ഷേത്രത്തില് നില്ക്കുകയോ ചെയ്താല് (ഇത് പുരുഷ ജാതകത്തിലെ കാര്യമാണ്) ജാതകന്റെ ഭാര്യ പതിവ്രതയായിരിക്കും എന്നുമാത്രമല്ല ഈ ഗ്രഹനിലയുളളവര് ജീവിതാന്ത്യത്തിലും വളരെ സുഖം അനുഭവിക്കുന്നവരുമായിരിക്കും. ശനിയാഴ്ച, സ്വവര്ഗ്ഗസ്ഥിതി, വര്ഗ്ഗോത്തമം, ദക്ഷിണായനം, കറുത്തപക്ഷം എന്നിവയിലെല്ലാം ശനിക്ക് ബലമേറും.
സൂര്യക്ഷേത്രമായ ചിങ്ങത്തില് ശനി നിന്നാല് ലുപ്തസന്താനയോഗമാണ്. ജാതകന് പ്രാരാബ്ധക്കാരനായും ഭവിക്കും. ചന്ദ്രക്ഷേത്രമായ കര്ക്കടകത്തില് ശനി നിന്നാല് നിരതെറ്റിയ പല്ലുള്ളവനും, അറിവു കുറഞ്ഞവനും, അമ്മയെ വേര്പെട്ടു നില്ക്കുന്നവനുമായി ഭവിക്കും. കുജക്ഷേത്രമായ മേടവൃശ്ചികങ്ങളിലേതിലെങ്കിലുമാണ് ശനിയെങ്കില് ജാതകന് സഞ്ചാരിയും അറിവുകുറഞ്ഞവനും നിര്ദ്ദയനുമായിരിക്കും. വൃശ്ചികത്തില് ശനി നില്ക്കുന്നവര്ക്ക് പട്ടാളം, പൊലീസ്, ജയില് വകുപ്പുകളില് ജോലികിട്ടാം. ബുധക്ഷേത്രമായ മിഥുനത്തിലോ കന്നിയിലോ ആണ് ശനിയെങ്കില് വിദ്യാകാര്യങ്ങളില് പി
ന്നോക്കമാകും. സുഖവും ധനവും കുറയും. ഏതു കാര്യത്തിലും നായകസ്ഥാനം കിട്ടും. ധനുവിലോ മീനത്തിലോ ആണ് ശനിയെങ്കില് ജാതകന് നീതിബോധമുള്ളവനായിരിക്കും. സര്ക്കാര് ആനുകൂല്യമുള്ള തൊഴില് ലഭിക്കും. ജാതകന് അസൂയക്കാരേറും. ശനി സ്വക്ഷേത്രമായ മകരത്തിലോ കുംഭത്തിലോ ആണ് നില്ക്കുന്നതെങ്കില് ജാതകന് അധികാരസ്ഥാനത്തെത്തുന്നവനായിരിക്കും. കീഴ്ജീവനക്കാര് ധാരാളമുണ്ടാകും. ശരീരത്തിന് വിയര്പ്പുഗന്ധം കാണും. മകരത്തില് ശനി നില്ക്കുന്നവര് മിതഭാഷികളായിരിക്കും.
(ജ്യോതിഷസുധ എന്ന ഗ്രന്ഥത്തില് നിന്ന്)
