തിരുവനന്തപുരം: കാസര്ഗോഡ്, വയനാട് ഗവ. മെഡിക്കല് കോളജുകളിലേക്ക് പുതുതായി അനുവദിച്ച തസ്തികകളിലെ ആശയക്കുഴപ്പം പരിഹരിക്കണമെന്ന് എബിവിപി സംസ്ഥാന ജോ. സെക്രട്ടറി എം. ആര്യലക്ഷ്മി. അടുത്ത കാലത്താണ് കാസര്കോട്, വയനാട് മെഡിക്കല് കോളജുകള്ക്ക് എംബിബിഎസ് കോഴ്സുകള്ക്ക് അനുമതി ലഭിച്ചത്. ഇവിടേക്കാണ് പുതിയ 44 തസ്തികകള് അനുവദിച്ചത്.
പ്രൊഫസര്, അസിസ്റ്റന്റ് പ്രൊഫസര് തസ്തികകളിലായി 22 എണ്ണമാണ് അനുവദിച്ചത്. എന്നാല് ഇത് ഏത് വിഭാഗത്തിലാണ് എന്നോ ഓരോ കോളജിലും എത്ര തസ്തികകള് വീതമാണ് എന്നും ഉത്തരവിലില്ല. രണ്ട് മെഡിക്കല് കോളജുകളിലും 50 സീറ്റുകള് വീതമാണുള്ളത്. പ്രിന്സിപ്പലിന് പുറമേ 14 പ്രൊഫസര്, 20 അസോ. പ്രൊഫസര്, 25 അസി. പ്രൊഫസര്, 23 സീനിയര് റസിഡന്റ്, 15 ട്യൂട്ടര് ഉള്പ്പെടെ 97 തസ്തികകളാണ് വേണ്ടത്. കാസര്കോട്, 61 തസ്തികകളാണ് സൃഷ്ടിച്ചിരുന്നത്. 19 തസ്തികകളില് മാത്രമാണ് നിയമനം നടന്നത്.
ഇതില് ഒരു പ്രൊഫസര് പോലുമുണ്ടായിരുന്നില്ല. അതേപോലെ കാസര്കോട് ഗവ. മെഡിക്കല് കോളജില് ആവശ്യത്തിന് മിനിസ്റ്റീരിയല് ജീവനക്കാരുടെ തസ്തികകളും സൃഷ്ടിച്ചിട്ടില്ല. ഈ സാഹചര്യത്തില് നിരന്തര ആവശ്യത്തെ തുടര്ന്നാണ് പുതിയ തസ്തികകള് സൃഷ്ടിച്ചത്.
പുതിയ തസ്തികകള് അനുവദിച്ചെങ്കിലും അവയിലെ വ്യക്തതക്കുറവ് രണ്ട് മെഡിക്കല് കോളജുകളുടെയും പ്രവര്ത്തനത്തെ ബാധിക്കുമെന്നതിനാല് ഈ പ്രശ്നത്തിന് എത്രയും പെട്ടെന്ന് പരിഹാരം ഉണ്ടാക്കണമെന്ന് പ്രസ്താവനയില് എം. ആര്യലക്ഷ്മി ആവശ്യപ്പെട്ടു.
