തിരുവനന്തപുരം: വിദ്യാര്‍ത്ഥികള്‍ ഫുട്‌ബോള്‍ കളിക്കുന്നതുമായി ബന്ധപ്പെട്ടുണ്ടായ തര്‍ക്കത്തിനിടെ സുവിശേഷ വിദ്യാര്‍ത്ഥിയായ അലന്‍(19) കുത്തേറ്റുമരിച്ച സംഭവത്തില്‍ രണ്ടുപേര്‍ അറസ്റ്റില്‍. ജഗതി കോളനി ടിസി 16/ 925 സന്ദീപ് ഭവനില്‍ സന്ദീപ്(25), കുന്നുകുഴി തേക്കുംമൂട് തോട്ടുവരമ്പ് വീട്ടില്‍ അഖിലേഷ് (21) എന്നിവരെയാണ് കന്റോണ്‍മെന്റ് പോലീസ് അറസ്റ്റ് ചെയ്തത്. കേസില്‍ പ്രായപൂര്‍ത്തിയാകാത്ത രണ്ടുപേര്‍ കൂടി കസ്റ്റഡിയിലുണ്ട്. ഇവരുടെ അറസ്റ്റ് രേഖപ്പെടുത്തിയിട്ടില്ല.
രാജാജി നഗറിന് സമീപം അരിസ്‌റ്റോ ജങ്ഷന്‍ തോപ്പില്‍ ഡി 47 വീട്ടില്‍ അലനെ തിങ്കളാഴ്ച വൈകിട്ട് അഞ്ച് മണിയോടെ തൈക്കാട് ശാസ്താക്ഷേത്രത്തിന് സമീപം നടുറോഡില്‍വച്ച് സംഘം ചേര്‍ന്ന് മര്‍ദിച്ച് ഹെല്‍മറ്റുകൊണ്ട് തലയ്‌ക്കടിച്ചുവീഴ്‌ത്തി കുത്തിക്കൊല്ലുകയായിരുന്നു. ഇടതുനെഞ്ചില്‍ ആഴത്തില്‍ കുത്തേറ്റ അലനെ ജനറല്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. ഒരു മാസം മുന്‍പ് രണ്ട് പ്രാദേശിക ക്ലബ്ബുകളുടെ ഫുട്‌ബോള്‍ മത്സരത്തിലുണ്ടായ തര്‍ക്കമാണ് കൊലപാതകത്തില്‍ കലാശിച്ചത്. ഒത്തുതീര്‍പ്പ് ചര്‍ച്ചയ്‌ക്കായി തിങ്കളാഴ്ച ഒത്തുകൂടിയ സംഘങ്ങള്‍ തമ്മില്‍ വീണ്ടും സംഘര്‍ഷമുണ്ടാവുകയായിരുന്നു.
അലനെ കുത്തിക്കൊലപ്പെടുത്തിയ ആളെ ഇതുവരെ പിടികൂടിയിട്ടില്ല. ഇയാള്‍ ഒളിവിലാണെന്നാണ് പോലീസ് പറയുന്നത്. കേസിലെ ആറും ഏഴും പ്രതികളാണ് അറസ്റ്റിലായ സന്ദീപും അഖിലേഷും. നിരവധി കേസുകളില്‍ പ്രതിയായ സന്ദീപ് കാപ്പ ലിസ്റ്റില്‍ ഉള്‍പ്പെട്ടയാളാണ്. ഇവരെ റിമാന്‍ഡ് ചെയ്തു.
തിരുവനന്തപുരം മെഡിക്കല്‍ കോളജ് ആശുപത്രിയില്‍ പോസ്റ്റ്‌മോര്‍ട്ടത്തിനു ശേഷം മൃതദേഹം ബന്ധുക്കള്‍ക്ക് വിട്ടുകൊടുത്തു. അലനും മാതാവ് മഞ്ജുളയും താമസിക്കുന്ന തോപ്പിലെ വാടകവീട്ടില്‍ സ്ഥല സൗകര്യമില്ലാത്തതിനാല്‍ വലിയവിളയിലുള്ള അലന്റെ മാതൃസഹോദരിയുടെ വസതിയില്‍ പൊതുദര്‍ശനത്തിന് വച്ചശേഷം മുട്ടട പെന്തക്കോസ്തല്‍ ചര്‍ച്ചില്‍ സംസ്‌കരിച്ചു. അലന്റെ അച്ഛനും സഹോദരിയും നേരത്തെ മരിച്ചിരുന്നു. അമ്മ വീട്ടുവേല ചെയ്യുകയാണ്. കഴിഞ്ഞവര്‍ഷം സഹോദരിയും മരിച്ചതോടെയാണ് അലന്‍ സുവിശേഷ പഠനത്തിന് ചേര്‍ന്നത്.
