ന്യൂദല്ഹി: ദല്ഹി കാര്ബോംബ് സ്ഫോടനത്തിന്റെ പശ്ചാത്തലത്തില് അമോണിയം നൈട്രേറ്റ് പോലുള്ള സ്ഫോടകവസ്തുക്കള് ഉപയോഗിച്ച് എങ്ങിനെ മാരകമായ ബോംബുണ്ടാക്കാം എന്നത് സംബന്ധിച്ച് വിശദമായ വീഡിയോകള് ചില ടിവി ചാനലുകള് സംപ്രേഷണം ചെയ്തത് ശ്രദ്ധയില്പ്പെട്ടെന്നും ഇനി ഇത്തരം രീതിയിലുള്ള രാജ്യദ്രോഹപരമായ ഉള്ളടക്കങ്ങള് പ്രസിദ്ധീകരിക്കരുതെന്നും കേന്ദ്ര സര്ക്കാര്. കേന്ദ്ര വാര്ത്താവിനിമയ വകുപ്പാണ് ഇത് സംബന്ധിച്ച് താക്കീത് നല്കിയിരിക്കുന്നത്.
അതുപോലെ ഭീകരവാദപ്രവര്ത്തനങ്ങളെ ന്യായീകരിക്കുന്ന വാര്ത്തകളും പല ചാനലുകളും നല്കുന്നത് ശ്രദ്ധയിപ്പെട്ടിട്ടുണ്ട്. ഇത് വേണ്ടെന്നും കേന്ദ്രം വിലക്കി. പ്രത്യേകിച്ചും ദല്ഹിയില് കാര്ബോംബ് സ്ഫോടനം നടത്തിയ ഉമ്മര് നബി എന്ന ചാവേര് കൃത്യം നിര്വ്വഹിക്കുന്നതിന് മുന്പ് ചിത്രീകരിച്ച വീഡിയോയില് എന്താണ് ഒരു ചാവേര് എന്നും ചാവേര് ആക്രമണമെന്നും വിവരിക്കുന്നുണ്ട്. ഉമ്മര് നബിയുടെ വിശദീകരണം ചാവേര് ആക്രമണത്തോട് ആരാധന വളര്ത്തുന്ന രീതിയിലാണ്. പല ചാനലുകളും റിപ്പോര്ട്ട് ചെയ്തതും ഏതാണ്ട് ഈ രിതിയിലാണ്. ഇത്തരം ഭീകരവാദികളെ ന്യായീകരിക്കുന്ന വീക്ഷണകോണില് കാര്യങ്ങള് അവതരിപ്പിക്കരുതെന്നും വാര്ത്താചാനലുകളോട് കേന്ദ്രസര്ക്കാര് താക്കീത് നല്കിയിട്ടുണ്ട്.
