ന്യൂദല്ഹി: ദല്ഹിയില് കാര്സ്ഫോടനത്തിന് മുന്പേ ഡ്രോണുകളും റോക്കറ്റുകളും ഉപയോഗിച്ച് ഹമാസ് ശൈലിയില് ആക്രമണം നടത്താന് ഭീകരര് പദ്ധതിയിട്ടിരുന്നുവെന്ന് വെളിപ്പെടുത്തല്. ആയുധങ്ങള് ഘടിപ്പിച്ച ഡ്രോണുകളും റോക്കറ്റുകളും ഉപയോഗിച്ച് ആക്രമണം നടത്താന് പദ്ധതിയിട്ടിരുന്നുവെന്നാണ് കാര്സ്ഫോടനം നടത്തി ചാവേറായ ഉമര് നബിയുടെ അറസ്റ്റിലായ സുഹൃത്ത് എന്ഐഎയോട് വെളിപ്പെടുത്തിയിരിക്കുന്നത്.
2023 ഒക്ടോബര് 7ന് ഹമാസ് അതിര്ത്തി ലംഘിച്ച് ഇസ്രയേലിന്റെ ഉള്ളില് കയറി ആക്രമണം നടത്തിയത് ഇതേ രീതിയിലാണ്. അന്ന് ഹമാസ് ഡ്രോണുകളും റോക്കറ്റുകളും ഉപയോഗിച്ച് നടത്തിയ ആക്രമണത്തില് 1139 പേര് കൊല്ലപ്പെട്ടു. ഇതിന് സമാനമായ ആക്രമണമാണ് ഭീകരരായ ഡോക്ടര്മാരുടെ സംഘം ആസൂത്രണം ചെയ്തിരുന്നതെന്നാണ് വെളിപ്പെടുത്തല്. ഡാനിഷ് എന്ന വിളിപ്പേരുള്ള ജസീര് ബിലാല് വാനിയാണ് ഇക്കാര്യം തുറന്നുപറഞ്ഞിരിക്കുന്നത്.
റോക്കറ്റുകള് നിര്മ്മിക്കുന്നതിനും ഡ്രോണുകളില് സ്ഫോടകവസ്തുക്കള് ഘടിപ്പിക്കുന്നതിനും ആവശ്യമായ സാങ്കേതിക സഹായങ്ങളും ഡാനിഷ് എന്ന ജസീര് ബിലാല് വാനി വെള്ളക്കോളര് ഭീകരരായ ഡോക്ടര്മാര്ക്കും ചാവേറായ ഉമര് നബിയ്ക്കും നല്കിയിരുന്നു. ആളുകള് കൂടുന്ന സ്ഥലത്ത് ഡ്രോണ് ഉപയോഗിച്ച് സ്ഫോടനം നടത്തി പരമാവധി ആളുകളെ വധിക്കുകയായിരുന്നു ലക്ഷ്യം. പക്ഷെ അതിന് മുന്പേ ഭീകരര് വലയിലായി.
