രാസലഹരിക്കടത്ത്: ശ്രാവണ്‍ താര വാഗമണ്ണിലേക്കു കടന്നത് ഭര്‍ത്താവ് ആലപ്പുഴയില്‍ അറസ്റ്റിലായതോടെ

ഇടുക്കി: വാഗമണ്ണില്‍ നിന്ന് അറസ്റ്റിലായ ശ്രാവണ്‍ താരയും ആലപ്പുഴയില്‍ പിടിയിലായ ഭര്‍ത്താവ് ശ്രീമോനും സംസ്ഥാനത്തെ രാസലഹരി വില്‍പ്പന സംഘത്തിലെ പ്രധാന കണ്ണികളെന്ന് എക്സൈസ് . തദ്ദേശസ്വയംഭരണ തെരഞ്ഞെടുപ്പുമായി ബന്ധപ്പെട്ട് എക്സൈസ് വകുപ്പിന്റെ നേതൃത്വത്തില്‍ ഇടുക്കി ജില്ലയില്‍ നടത്തുന്ന വാഹന പരിശോധനയ്‌ക്കിടയിലാണ് കഴിഞ്ഞ ദിവസം വാഗമണ്ണില്‍ വച്ച് കോഴിക്കോട് സ്വദേശികളായ മുഹമ്മദ് ഫവാസ് (32), ശ്രാവണ്‍ താര (24) എന്നിവര്‍ പിടിയിലായത്. ശ്രാവണ്‍ താരയുടെ ഭര്‍ത്താവ് ശ്രീമോനെ കഴിഞ്ഞ ദിവസം 430 ഗ്രാം എംഡിഎംഎയുമായി ആലപ്പുഴയില്‍ പൊലീസ് പിടികൂടിയിരുന്നു.
50 ഗ്രാം എംഡിഎംഐ, 2.970 ഗ്രാം ഹാഷിഷ് ഓയില്‍, 5 ഗ്രാം കഞ്ചാവ് എന്നിവ ശ്രാവണ്‍ താരയുടെ വാഹനത്തില്‍ നിന്ന് പിടികൂടി. ഇവര്‍ താമസിച്ചിരുന്ന റിസോര്‍ട്ടില്‍ നിന്ന് മൂന്ന് ലക്ഷത്തിലേറെ രൂപയും കണ്ടെടുത്തു.
ഭര്‍ത്താവ് പിടിയിലായതോടെയാണ് ശ്രാവണ്‍ താരയും ഭര്‍ത്താവിന്റെ സുഹൃത്തായ ഫവാസും വാഗമണ്ണിലേക്ക് കടന്നത്.