തിരുവനന്തപുരം:
തിരുവനന്തപുരത്തെ ശാസ്തമംഗലം വാർഡിൽ ബിജെപി ടിക്കറ്റിൽ മത്സരിക്കുന്ന മുൻ ഡിജിപി ആർ. ശ്രീലേഖ ഐപിഎസ് ശക്തമായ പ്രചാരണത്തിലാണ്. വീടുതോറും നടത്തിക്കുന്ന തെരഞ്ഞെടുപ്പ് പര്യടനത്തിൽ സ്ഥാനാർത്ഥിക്ക് ലഭിക്കുന്ന ഊഷ്മള സ്വീകരണമാണ് ശ്രദ്ധേയമാകുന്നത്. വീട്ടിൽ കയറ്റിയിരുത്തി ചായയും വെള്ളവും വച്ച് ആദരിക്കുന്നതിനാൽ ഒരു മണിക്കൂറിൽ 30ഓളം വീടുകളാണ് സന്ദർശിക്കാൻ കഴിയുന്നതെന്ന് ശ്രീലേഖ ഹാസ്യചൂടോടെ പറയുന്നു.
കേരളത്തിലെ ആദ്യ വനിതാ ഡിജിപി എന്ന നിലയും ശക്തമായ വനിതാ നേതൃപ്രതിച്ഛായയും ശ്രീലേഖയ്ക്ക് വനിതകളിലും യുവതികളിലും വലിയ പിന്തുണ നേടിക്കൊടുത്തുവെന്നാണ് പ്രചാരണത്തിന്റെ ഭാവം.
ഡിജിപി സ്ഥാനത്തിൽ നിന്ന് വിരമിച്ചതിനെ തുടർന്ന് 2024 ഒക്ടോബറിലാണ് ശ്രീലേഖ ഔദ്യോഗികമായി ബിജെപിയിൽ ചേർന്നത്. “വികസനം വേണമെങ്കിൽ ബിജെപി ജയിക്കണം എന്ന ആശയം ജനങ്ങൾക്ക് മനസ്സിലായിട്ടുണ്ട്. ഇടത്–കോൺഗ്രസ് എന്ന പരമ്പരാഗത ചിന്തയിൽ വലിയ മാറ്റം വന്നു,” എന്നും ശ്രീലേഖ അഭിപ്രായപ്പെട്ടു.
തനിക്ക് വിജയം ഉറപ്പാണെന്നും ഇത്തവണ തിരുവനന്തപുരം കോർപറേഷൻ ബിജെപിയുടെ പിടിയിലേക്ക് മാറുമെന്നുമാണ് ശ്രീലേഖയുടെ വിലയിരുത്തൽ. ജനങ്ങളുടെ പ്രതികരണത്തിൽ നിന്നാണ് ഈ ആത്മവിശ്വാസം വരുന്നതെന്നും അവർക്കു കൂട്ടിച്ചേർത്തു. അഴിമതിയില്ലാത്ത ഭരണം, വികസിത അനന്തപുരി എന്നിവയാണ് ബിജെപിയുടെ പ്രധാനലക്ഷ്യമെന്നും ശ്രീലേഖ പറയുന്നു. അമ്മാര്ക്കും സ്ത്രീകളുടെ സംരക്ഷണത്തിനും വേണ്ടി പലതും ചെയ്യണമെന്നുണ്ടെന്നും അവര് പറയുന്നു. ജനങ്ങളുടെ പടിപ്പുരയ്ക്കല് തന്നെ കോര്പറേഷന് ഭരണം എത്തിക്കുന്ന രീതിയില് എഐ സംവിധാനങ്ങളുപയോഗിച്ചുള്ള ആപുകളും മറ്റ് ആധുനികസാങ്കേതികവിദ്യകളും ഉപയോഗിക്കുന്ന സംവിധാനം കൊണ്ടുവരുമെന്നും ആര് ശ്രീലേഖ പറയുന്നു. ഏതാനും ദിവസം മുന്പ് ഇടപ്പഴഞ്ഞി സുബ്രഹ്മണ്യക്ഷേത്രത്തിലെ പ്രാര്ത്ഥനയോടെയാണ് ശ്രീലേഖ പ്രചാരണം ആരംഭിച്ചത്. ഡിജിപിയായിരുന്ന ഒരാള് വാര്ഡ് കൗണ്സിലറായി മത്സരിക്കുക എന്നത് വഴി ശക്തമായ ഒരു സന്ദേശമാണ് ജനങ്ങള്ക്ക് കൊടുക്കുന്നതെന്നാണ് ശ്രീലേഖയുടെ മറുപടി.
“ആർ. ശ്രീലേഖ ഐപിഎസ് എന്ന് പറഞ്ഞാൽ ആളുകൾക്കും വ്യക്തമായി തിരിച്ചറിയാൻ കഴിയുന്നു. അഡ്വക്കേറ്റ്, ഡോക്ടർ എന്നിവർക്കുള്ളതുപോലെ ഐപിഎസ് എന്നത് പേരിനൊപ്പം ഉപയോഗിക്കാനിടയുള്ള ഒരു ഔദ്യോഗിക തിരിച്ചറിയലാണ്. അത് ജീവിതകാലം മുഴുവൻ കൂടെയുണ്ടാവും,” എന്നായിരുന്നു ഇടതുപക്ഷത്തിൽ നിന്ന് ഉയർന്ന ‘ഐപിഎസ്’ ഉപയോഗ വിവാദങ്ങൾക്ക് ശ്രീലേഖ നൽകിയ മറുപടി.
