ആറ്റിങ്ങല്: അഴിമതിയില് മുങ്ങി നില്ക്കുന്ന ആറ്റിങ്ങല് നഗരസഭയില് വികസനം ലക്ഷ്യം വെച്ചുള്ള സംശുദ്ധമായ ഭരണം കാഴ്ചവയ്ക്കുമെന്ന് മുന് കേന്ദ്രമന്ത്രി വി. മുരളീധരന് പറഞ്ഞു. ദ്വാരക ഓഡിറ്റോറിയത്തില് ബിജെപി സ്ഥാനാര്ഥികളെ പ്രഖ്യാപിച്ച് സംസാരിക്കുകയായിരുന്നു ആദ്ദേഹം.
സാധാരണ ജനങ്ങളില് ഭൂരിഭാഗവും പ്രശ്നങ്ങളില് പരിഹാരം കാണാനായി തദ്ദേശ സ്വയംഭരണ സ്ഥാപങ്ങളെയാണ് ആശ്രയിക്കുന്നത്. അവര്ക്ക് ആവശ്യമായ സേവനം ഇവിടെ നിന്നും ലഭിക്കുന്നില്ല. നിലവില് സംസ്ഥാന ഭരണവും തദ്ദേശ ഭരണവും അഴിമതിയില് മുങ്ങി നില്ക്കുകയാണ്. കടക്കെണിയിലാണെന്ന് സര്ക്കാര് തന്നെ സമ്മതിച്ചു കഴിഞ്ഞെന്നും ശബരിമലയടക്കം കൊള്ളയടിക്കുന്ന സര്ക്കാരാണ് കേരളം ഭരിക്കുന്നതെന്നും വി.മുരളീധരന് പറഞ്ഞു .
32 വാര്ഡുകളില് 25 വാര്ഡുകളിലെ സ്ഥാനാര്ഥികളെ പ്രഖ്യാപിച്ചു. സ്ഥാനാര്ഥികളെ മുരളീധരന് ഷാള് അണിയിച്ച് സ്വീകരിച്ചു. ആറ്റിങ്ങല് മണ്ഡലം പ്രസിഡന്റ് ബൈജു അധ്യക്ഷനായിരുന്നു. സംസ്ഥാന വൈസ് പ്രസിഡന്റ് അഡ്വ. പി. സുധീര്, തോട്ടയ്ക്കാട് ശശി, ജില്ലാ പ്രസിഡന്റ് റജികുമാര് തുടങ്ങിയവര് പങ്കെടുത്തു. സ്ഥാനാര്ത്ഥികള് നഗര പ്രദിക്ഷണവും നടത്തി.
പൂവന്പാറ വാര്ഡില് മത്സരിക്കുന്ന ദീപാ രാജേഷും കൊട്ടിയോട് വാര്ഡില് മത്സരിക്കുന്ന രാജേഷ് മാധവനും, കരിച്ചയില് വാര്ഡില് മത്സരിക്കുന്ന ദീപ്തി ജീവന് ലാലും തച്ചൂര്ക്കുന്ന് വാര്ഡില് മത്സരിക്കുന്ന ജീവന് ലാല് സി.എസും ദമ്പതിമാരാണ്. ഇതില് ദീപാ രാജേഷും ജീവന് ലാല് സി. എസും നിലവില് കൗണ്സിലര്മാരാണ്.
