തിരുവനന്തപുരം: പി എം ശ്രീ പദ്ധതി മരവിപ്പിച്ചത് അറിയിച്ച് കേന്ദ്രത്തിന് കത്ത് നല്‍കാന്‍ വൈകുന്നത് എല്‍ഡിഎഫില്‍ ഉന്നയിക്കാന്‍ സിപിഐ തീരുമാനം. സിപിഐ സംസ്ഥാന സെക്രട്ടേറിയേറ്റ് യോഗത്തിലാണ് തീരുമാനം. കത്തയക്കാന്‍ തീരുമാനിച്ച് രണ്ടാഴ്ചയാകുന്ന സാഹചര്യത്തിലാണ് സിപി ഐ നീക്കം.
പി എം ശ്രീ പദ്ധതി മരവിപ്പിച്ചെങ്കിലും കാര്യം ഇതുവരെ കേന്ദ്ര വിദ്യാഭ്യാസ മന്ത്രാലയത്തെ അറിയിച്ചിട്ടില്ല എന്ന് വിദ്യാഭ്യാസ മന്ത്രി വി ശിവന്‍കുട്ടി വെളിപ്പെടുത്തിയിരുന്നു.കത്ത് കേന്ദ്രത്തിന് കൈമാറാനുള്ള നടപടികള്‍ പുരോഗമിക്കുകയാണെന്നാണ് മന്ത്രി പറഞ്ഞത്. പിഎം ശ്രീ പദ്ധതി സംബന്ധിച്ച് സര്‍ക്കാര്‍ രൂപീകരിച്ച ഉപസമിതിയുടെ തീരുമാനം കേന്ദ്രത്തെ അറിയിക്കും.
കേന്ദ്ര വിദ്യാഭ്യാസ മന്ത്രി ധര്‍മ്മേന്ദ്ര പ്രധാനുമായുമായി നടന്ന ചര്‍ച്ചയില്‍ പി എം ശ്രീയുമായി ബന്ധപ്പെട്ട് സംസ്ഥാന സര്‍ക്കാര്‍ സ്വീകരിച്ച നിലപാട് അറിയിച്ചെന്ന് വി ശിവന്‍കുട്ടി പറഞ്ഞിരുന്നു.ഉപസമിതി റിപ്പോര്‍ട്ട് വന്ന ശേഷമേ രേഖമൂലം കത്തയക്കുകയുള്ളുവെന്നും മന്ത്രി വ്യക്തമാക്കി. എന്നാല്‍ കത്ത് നല്‍കാന്‍ വൈകുന്നതില്‍ സിപിഐക്ക് എതിര്‍പ്പുണ്ട്.
