ന്യൂദൽഹി : ചെങ്കോട്ടയ്ക്ക് സമീപമുള്ള കാർ ബോംബാക്രമണം രാജ്യത്തെയാകെ പിടിച്ചുലച്ചു. ഈ സ്ഫോടനത്തെത്തുടർന്ന്, “ഓപ്പറേഷൻ സിന്ദൂരിന്റെ” രണ്ടാം ഘട്ടം ആരംഭിക്കാൻ പോകുകയാണോ എന്ന ചോദ്യങ്ങളും ഇപ്പോൾ ഉയരുന്നുണ്ട്. കേന്ദ്രസർക്കാർ സ്ഫോടനത്തെ ഭീകരാക്രമണമായി കണക്കാക്കിയാണ് അന്വേഷിക്കുന്നതെന്ന് സർക്കാർ വൃത്തങ്ങൾ അറിയിച്ചു. എന്നാൽ, ഏജൻസികൾ ഒരു നിഗമനത്തിലെത്തുന്നതുവരെ അഭിപ്രായം പറയാനാകില്ലെന്നാണ് ആഭ്യന്തരമന്ത്രി അമിത് ഷാ അറിയിച്ചത് . സുരക്ഷാ ഏജൻസികൾക്ക് ലഭിച്ച സൂചനകൾ ഇത് മുൻകൂട്ടി ആസൂത്രണം ചെയ്ത ആക്രമണമാണെന്ന് വ്യക്തമായി സൂചിപ്പിക്കുന്നുമുണ്ട്.
ഇന്റലിജൻസ് വൃത്തങ്ങൾ പറയുന്നതനുസരിച്ച്, പുതിയൊരു ലഷ്കർ-ഇ-തൊയ്ബ മൊഡ്യൂളിന്റെ പ്രവർത്തനങ്ങൾ അടുത്തിടെ ആരംഭിച്ചു . ഒരു വീഡിയോയിൽ, ലഷ്കർ കമാൻഡർ സെയ്ഫ് അവകാശപ്പെട്ടത് “ഹാഫിസ് സയീദ് വെറുതെ ഇരിക്കുന്നില്ല; സംഘടന ബംഗ്ലാദേശ് വഴി ഇന്ത്യയിലേക്ക് നുഴഞ്ഞുകയറാൻ തയ്യാറെടുക്കുകയാണ്” എന്നാണ്. അസം, പശ്ചിമ ബംഗാൾ, ത്രിപുര എന്നിവിടങ്ങളിൽ തങ്ങളുടെ പിടി ശക്തിപ്പെടുത്തുന്നതിനായി ബംഗ്ലാദേശിൽ ലഷ്കർ തങ്ങളുടെ ലോജിസ്റ്റിക്കൽ നെറ്റ്വർക്ക് സ്ഥാപിക്കാൻ തുടങ്ങിയതായും ഏജൻസികൾക്ക് വിവരം ലഭിച്ചു. ഈ മുഴുവൻ ഓപ്പറേഷനും ഐഎസ്ഐയുടെ പിന്തുണയും ഉണ്ടെന്നാണ് റിപോർട്ട്.
അന്വേഷണത്തിൽ ലഷ്കറിന്റെയോ ജെയ്ഷെ മുഹമ്മദിന്റെയോ പങ്കാളിത്തം തെളിഞ്ഞാൽ, പാകിസ്ഥാനിലെ തീവ്രവാദ കേന്ദ്രങ്ങൾക്കെതിരെ ഇന്ത്യ വീണ്ടും തിരിച്ചടിച്ചേക്കാം. രാജ്യത്തിനുള്ളിൽ നടക്കുന്ന ഏതൊരു ഭീകരാക്രമണവും ഇപ്പോൾ യുദ്ധമായി കണക്കാക്കുമെന്ന് സർക്കാർ ഇതിനകം വ്യക്തമാക്കിയിട്ടുണ്ട്. കൂടാതെ, ഓപ്പറേഷൻ സിന്ദൂർ അവസാനിച്ചിട്ടില്ലെന്ന് പ്രസ്താവിച്ചിട്ടുമുണ്ട്.
ഓപ്പറേഷൻ സിന്ദൂരിനെത്തുടർന്ന്, നിരവധി ജെയ്ഷെ, ലഷ്കർ ക്യാമ്പുകൾ ഇന്ത്യൻ അതിർത്തിയിൽ നിന്ന് ഏകദേശം 350 കിലോമീറ്റർ അകലെയുള്ള പാകിസ്ഥാനിലെ ഖൈബർ പഖ്തൂൺഖ്വയിലേക്ക് മാറ്റിയിരുന്നു. എന്നാൽ ഒരു ഭീകര ക്യാമ്പും നമ്മുടെ പരിധിക്ക് പുറത്തല്ലെന്ന് വ്യോമസേനാ മേധാവി അടുത്തിടെ പറഞ്ഞിരുന്നു.
മാത്രമല്ല മുൻപ് പഹൽഗാം ആക്രമണം നടന്നപ്പോൾ ഉണ്ടായ അതേരീതിയിൽ മോദി ഇന്ന് രാജ്യത്തിന് ഉറപ്പ് നൽകുകയും ചെയ്തു.ഈ ഗൂഢാലോചനയ്ക്ക് പിന്നിൽ ആരായാലും അവരെ വെറുതെ വിടില്ല. ഞങ്ങളുടെ ഏജൻസികൾ ഈ ഗൂഢാലോചനയുടെ വേരുകൾ കണ്ടെത്തും” എന്നാണ് മോദി പറഞ്ഞത്.
