കൊല്ലം: മന്ത്രി ഗണേഷ്കുമാറിന്റെ നേതൃത്വത്തില് ബുധനാഴ്ച തിരുവനന്തപുരത്ത് നടക്കുന്ന ആന ഉടമസ്ഥ സംസ്ഥാന സമ്മേളനത്തില് വനംവകുപ്പ് മന്ത്രിയും ചീഫ് വൈല്ഡ് ലൈഫ് വാര്ഡനും പങ്കെടുക്കില്ല.
ത്രിതല തെരഞ്ഞെടുപ്പും നിയമസഭ തെരഞ്ഞെടുപ്പും മുന്നിലുണ്ട്. അതിനാല് സമ്മേളനത്തില് പങ്കെടുക്കുകയോ, പ്രഖ്യാപനങ്ങളോ പാടില്ലെന്നാണ് നിര്ദ്ദേശം. ആന എഴുന്നള്ളത്ത്, ആനകളുടെ കൈമാറ്റം എന്നിവ സംബന്ധിച്ച് കേന്ദ്രസര്ക്കാര് നിലപാട് കേരളത്തിന് അനുകൂലമാണ്. ബിജെപി ഭരിക്കുന്ന ത്രിപുര, ആസാം സംസ്ഥാനങ്ങളില് നിന്നും കേരളത്തിലെ പ്രത്യേക സാഹചര്യം പരിഗണിച്ച് നാട്ടാനകളെ നല്കാന് തയ്യാറായിട്ടും എന് ഒസി നല്കാത്തത് കേരളമാണ്. തല്ക്കാലം ആനകള് വേണ്ടയെന്ന നിലപാട് എടുത്ത വനംവകുപ്പ് മേധാവിയെ തന്നെ സമ്മേളനത്തില് മുഖ്യാതിഥിയായി വിളിച്ച സംഭവത്തില് കേന്ദ്ര വനം പരിസ്ഥിതി മന്ത്രാലയം രഹസ്യാന്വേഷണ വിഭാഗം പ്രഖ്യാപിച്ചു. വനം മന്ത്രാലയവുമായി ബന്ധപ്പെട്ടു സ്വകാര്യവ്യക്തികള് നടത്തുന്ന സമ്മേളനത്തില് ഉദ്യോഗസ്ഥര് പങ്കെടുക്കരുതെന്ന നിര്ദ്ദേശം നല്കിയിട്ടുണ്ട്.
ഉടമസ്ഥാവകാശവും രേഖകളും ഡിഎന്എയും കൃത്യമായിട്ടുള്ള ആനകളുടെ കൈമാറ്റം അനുവദനീയമാണ്. കേരളത്തില് ഒരുവിഭാഗം ആന ഉടമസ്ഥരാണ് ആനകളെ എത്തിക്കുന്നതില് തടസം നില്ക്കുന്നത്. ഇ ഡി ഉള്പ്പെടെയുള്ള കേന്ദ്ര ഏജന്സികളെ ഉള്പ്പെടുത്തി ആന കടത്തുമായി ബദ്ധപ്പെട്ട് കേന്ദ്രം അന്വേഷണം പ്രഖ്യാപിച്ചു. വിദേശത്തുനിന്നും തീവ്രവാദ ഫണ്ട് ആന കൈമാറ്റവുമായി ബന്ധപ്പെട്ടു ലഭിച്ചെന്ന് കേന്ദ്രം കണ്ടെത്തി. കൊല്ലം, തൃശ്ശൂര്, പാലക്കാട്, കോഴിക്കോട്ട്, മാവേലിക്കര എന്നീ സ്ഥലങ്ങളിലെ ആന ഉടമസ്ഥരെ കേന്ദ്രീകരിച്ചാണ് അന്വേഷണം.
